Presidente ruso, Vladimir Putin (r), ta saludá e minister kubano, Bruno Rodriguez Parrilla, ku kende el a reuní ayera den Palasio di Parlamento di Kremlin, na Mosku.
MOSKU, Rusia (AFP).- E presidente ruso, Vladimir Putin, a risibí na Kremlin e kansiyer kubano Bruno Rodriguez ayera i a bisa ku su pais “semper lo sostené Cuba” kontra dje blokeo energétiko di parti di Merka. E krísis na Cuba a bira hopi mas serio den yanüari, despues ku e presidente di Merka, Donald Trump, a kòrta e entregá di petrolio venezolano na e isla despues dje kaida di Nicolás Maduro.
“Semper nos tabata na banda di Cuba den su lucha pa independensia i pa e derechi di sigui su mes kaminda”, segun Putin a bisa na momento di risibí Rodriguez den Kremlin. “Ta un periodo spesial, ku sanshonnan nobo. Bo sa kon nos ta pensa riba e punto aki. Nos no ta aseptá nada paresido”, segun e lider ruso a agregá.
Sinembargo, Mosku ainda no a komprometé su mes públikamente pa manda kombustibel ni ningun otro tipo di yudansa. “Lo mi ke gradisí e solidaridat ruso ekspresá pa e presidente i pa e gobièrnu ruso, pa e minister di Relashonnan Eksterior, di manera firma i kontinuo”, segun Rodriguez a respondé na e presidente ruso. E kansiyer a biaha pa Rusia, su aliado tradishonal, buskando yudansa. Durante e dia di ayera el a reuní ku e minister Serguei Lavrov, ku a bai bèk den e era soviétiko pa kritiká Washington. “Nos ta hasi un yamada na Merka pa aktua ku sentido komun i stòp ku e bloke militar i marítimo dje isla di libertat”, Lavrov a bisa .Den su kòmbersashonnan ku Lavrov, Rodriguez a duna di konosé ku Cuba lo no kambia su rumbo polítiko bou di preshon di Merka.
La Habana, e aliado di Mòsku for di tempu dje revolushon sosialista di dékada di 1960, durante di dékadanan largu a dependé di Union Soviétiko pa su apoyo ekonómiko i polítiko. Rusia ta mantené su “solidaridat ku nos amigunan”, Lavrov a bisa refiriendo na Cuba komo “un estado ruman”, pero no a hasi ningun promesa konkreto di apoyo material.
Cuba, ku ta konta ku 9.6 mion abitante, ta enfrentá un eskases grave di kombustibel di ‘black-out’ hopi largu na momento ku e gobièrnu di Trump ta intensifiká e embargo ku Washington a apliká kontra dje isla for di 1962.
