Presidente norteamerikano, Donald Trump, (r) huntu ku sheik Tamim bin Hamad al-Thani di Qatar durante di un sena na Lusail Palace den Doha.
DOHA, Qatar (AFP).- E kompania aéreo Qatar Airways a enkargá Boeing un pedido di 210 avion na rason di 96.000 mion dòler, segun White House a anunsiá ayera, pareu ku e bishita di presidente Donald Trump na e emirato.
Aunke ku Boeing i su klientenan no tin e kustumber pa divulgá preis di avionnan kumprá, ta trata, aparentemente, dje pedido di mas grandi registrá pa Boeing pa loke ta trata balor.
E kantidat mas grandi di avion ku a keda kumprá tabata den 2023, ora ku Air India a enkargá 220 avion pero e mayoria tabata 737 MAX, ku solamente un ‘gang’, miéntras ku e enkargo di Qatar Airways ta pa yumbonan 787 Dreamliner i 777X. E anunsio a tuma lugá pareu ku e bishita na Qatar di Trump, kende a reuní durante di kasi dos ora ku e emir, sheik Mohamed bin Abdulrahman al Thani.
Nan dos a firma akuerdonan di defensa, inkluso e kompra di parti di Qatar di dronenan norteamerikano MQ-9B.
“Ta e pedido di avion mas grandi den historia di Boeing, esei ta bastante bon”, segun Donald Trump, kende a bisa ku e kompra ta representá “mas ku 200.000 mion i 160 den kantidat di avion. Ta fantástiko, ta un rèkert!”
E preis, den katalòg, di un787 Dreamliner ta di 250 mion dòler i esun di un 777X den kareda di 440 mion.
E bishita na Qatar ta e di dos etapa dje gira di Donald Trump den Golfo, despues di un promé parada na Riad, kaminda sorpresivamente el a anunsiá ku Merka lo lanta e sanshonnan riba Siria i a reuní ku e presidente dje pais.
