QMQ Organization, ku Ayanette Statia na kabes ta na Mexico!

 

WILLEMSTAD.- Djamars 24 ougùstùs 2021, e dos beyesanan hóben, Danila Magdalena, Miss Teenage Globe Curaçao 2021 i Liyanne Hoevertsz, Miss Teenage Petite Globe Curaçao 2021 a sali rumbo pa Mexico p’asina bai representá Kòrsou den e sertámen internashonal, Miss Teen Globe International i Miss Teen Petite Globe International na Puerto Vallarta, Mexico.

Na yegada na aeropuerto tur dos partisipante a impaktá ku nan beyesa i a hala atenshon di hopi ku a buska tur forma pa a saka potrèt ku nan. Tabata bunita mira asina tantu persona ku bandera di Kòrsou pa apoyá nos dos beyesanan.

Despues di a wòrdu koroná dia 31 mei 2021, tur dos representante a drenta preparashon intensivo. Tantu pa nan parti físiko manera ehersisio, dieta, pasarela, makiahe pero tambe e parti vestuario i ‘public speaking’.

Un toke masha interesante durante e preparashon, di e dos beyesanan, tabata e parti di talento, kaminda e organisashon a skohe bailenan típiko di Kòrsou ku kasi hóbennan no ta baila mas, esta Wals, Mazurka i tumba. Durante e representashon na Mexico, e beyesanan lo demostrá nos kultura bibu.

QMQ Organization no tin niun duda ku Danila Magdalena i Liyanne Hoevertsz lo sa di saka kara di Kòrsou dignamente.

QMQ Organization ke yama danki na kada persona ku a yuda hasi e soño aki realidat i ku ta kere den sertámen di beyesa i e formashon su tras. Sin kada un di boso su granito, nos lo no por ta aki.

Sigui e dos beyesanan via e plataformanan sosial di Facebook, Instagram i Ttik Tok pa tur informashon.

Sertámen ta start ofisial awe, 27 ougùstùs 2021  ku diferente aktividat i Show final lo ta djamars, 31 ougùstùs 2021 i lo wòrdu transmití via facebook page di Miss Teen Globe International. Kòrda ‘like, vote and share’ pa mustra boso sosten.

LAGA UN KOMENTARIO

Please enter your comment!
Please enter your name here