MONTREAL, CANADA, AFP.- E provinsia kanades Quebec a bira e episentro mas resien di 160 kaso di kandela, ku ainda tabata kimando den e pais djamars. Mayoria kandela ta for di kontròl.
Den region di Abitibi-Temiscamingue, esun di mas afektá den e provinsia, e kandela ta “preokupante”, asina e promé minister di Quebec, François Legault a deklará.
“Nos ta eksperensiando un situashon nunka bisto, den Quebec kompleto”, asina Francois Bonnadel, minister di Seguridat Públiko di e provinsia a atvertí, menshonando ku un kantidat haltu di e kandelanan a surgi dor di negligensia humano.
“Na wèst di Canada sa tin hopi kandela den serunan. Esaki no ta e kaso na Quebec”, el a bisa. “Pero aktualmente tur kos ta kimando”.
Alrededor di 4.400 persona ku a keda evakuá por a regresá nan kasnan di Sept-Iles na nort, na kosta di riu St. Lawrence, danki na e yobida di awa ku a yuda stòp avanse di e kandelanan.
Pero mas na nort, tin “un kandela enorme ku lo tuma simannan pa paga kompletamente, pues mester ta kouteloso”.
