WILLEMSTAD. – Djarason 2 di òktober alrededor di 13.30’or, Sentral di Polis a dirigí un unidat pa un aksidente di tráfiko ku tres persona heridá riba Helmin Magno Wiels Boulevard. Na yegada di e unidat a topa tres vehíkulo ku a aksidentá i ku tres víktima.
For di investigashon preliminar ku polis a hasi na e sitio a resultá ku shofùr di un vehíkulo ku tabata kore riba Helmin Magno Wiels Boulevard direkshon di Otrobanda, a bai purba pasa un konvoi ku tabata riba mesun kaminda direkshon di Otrobanda. Probablemente dor di mal kalkulashon shofùr di e vehíkulo a dal kontra di e tayer di banda drechi di e konvoi. Dor di e impakto aki e outo a drei dilanti di e konvoi i aksidentá kontra di un palu, krusa e kaminda pa despues dal kontra un vehíkulo ku tabata bini for di Otrobanda direkshon di rotònde Julianadorp.
Shofùr di e vehíkulo ku no tabatin su faha di seguridat bistí a sufri multiple leshon i den situashon di prekupashon a transporté pa poliklínika di SEHOS pa tratamentu médiko. Dos okupante di e vehíkulo ku tabata bai direkshon di rotònde di Julianadorp tambe a keda transportá pa poliklínika di SEHOS pa tratamentu médiko.
Djáweps 3 di òktober alrededor di 11.45’or Sentral di Polis a keda notifiká ku e víktima, e hòmber Quenten A. Eugenio, nasé na Kòrsou dia 1 di desember 1996, a fayesé na hospital.
Investigashon den e kaso aki ta kontinuá dor di personal di e Departamento di Tráfiko.
