MERKA.- R. Kelly, kende mester a entrega su pasport i no tin mag di bandoná e estado di Illinois debí na un kaso kaminda e ta wòrdu persiguí pa abuso seksual, ke un pèrmit di hues pa e por biaha pa Dubai kaminda e tin entre 3 pa 5 show pa presentá.
E abogado di Kelly a hasi un petishon na korte i lo risibí un desishon riba su petishon mañan djabièrnè.
E kantante di R&B ku a keda lagá den libertat bou di fiansa tin un kontrakt firmá pa hasi presentashon kuminsamentu di aprel 2019. ‘E tin derechi di traha meskos ku tur hende ku ta den libertat bou di fiansa,’ asina su abogado a duna di konosé.
Kelly tin problema finansiero tambe. Resientemente el a keda detené i mester a pasa algun dia den prisòn, debí ku e no por a paga alimentashon di su yu. Siman pasá un hues a dikta ku Kelly mester sigui paga alimentashon na su eks kasá na balor di 21 mil dòler pa luna.
Mañan djabièrnè Kelly lo mester bolbe aparesé dilanti di korte relashoná ku un keho di abuso seksual. Kelly ta keda sospechá di abuso seksual kontra di 4 dama, di kua tres menor di edat. E kantante ta ninga ta akusashon.
