Despues di 4 aña nos tin bek huntu ku nos Rachelle le Blanc “Shelly” i e bia aki ku su pelíkula kòrtiku Thorn. Otro siman dia 10 di yüni lo tin premier den un sekshon priva pa un grupo selektá por apresiá kiko Rachelle a produsí. E mes tambe ta aktris den e ròl prinsipal di Thorn. El a laga nos sinti algu di kontenido di e pelíkula.
Despues di 4 aña riba pantaya
Rachelle a konta Djasabra ku despues di e entrevista 4 aña pasá, el a keda di ‘Cast’ pa un obra teatral na Merka i el a presentá na Atlanta na novèmber 2019. Esei tabata su último presentashon na Merka. El a bin Kòrsou ku fakansi i a keda pega aki dor di covid. El a kuminsá traha na LabdeMed i a keda einan den e departamento di merkadeo. Einan e ta te ainda. Komo Shelly ta stima aktuashon i filma, el a bin ku ideanan pa propagandanan pa LabdeMed. E propagandanan ku ta mira na televishon di LabdeMed ta ideanan ku e ta skibi i produsí i asina e ta keda aktivo den su pashon.
Pelíkula kòrtiku Thorn
Otro siman dia 10 di yüni tin lansamentu di e pelíkula kòrtiku Thorn (23 minüt). Thorn ke men kibra for di otro. E ta relatá un mama yòn ku ta hañ’é ku e tin di skohe entre su frei deboto i su kasá ku a kaba di sali for di koma despues di 8 aña. Aña pasá Shelly a kuminsá skibi e pelíkula aki pero e no a kaba. Despues un amiga di dje ku e ta traha kuné den produkshon na Merka a bis’é ku e pelíkula ta bon. E amiga a motiv’é pa e kaba di skibi e pelíkula i asina nan a film’é i a logra termin’é. Filmashon di Thorn a tuma lugá na Queens New York.
Dikon e historia
Dikon Thorn, dikon e pelíkula aki, tabata nos pregunta na Shelly. El a splika ku e no tin un kontesta dikon el a skibi un historia asina. E ta kòrda ku na kas na Merka e idea ei a drenta. Ta simplemente subi lèptòp i skibi. No a dura masha largu pa e skibié, kisas un pa dos luna.
Skibi i ròl prinsipal
Shelly tin e ròl prinsipal den e pelíkula. E ta e mama ku tin di skohe entre su frei deboto i su kasá ku ta sali for di e koma despues di 8 aña. Tur e otro aktor i aktrisnan den e pelíkula ta merikano. Shelly tabata e úniko yu Kòrsou den tur i e tabatin Mauricia Pictures ku a traha riba e parti di Post Productions, esta despues di a filma. Mauricia Pictures di Kòrsou a traha riba e zonido di e pelíkula.
Hopi detaye pa tene kuenta kuné
Traha un pelíkula no ta nada fásil, asina Shelly a bisa. E ta un aktris i e sa ku e tin talento pa skibi pero su pashon no ta einan. Pero el a kuminsá skibi i despues a para kuné. E no tabatin e inspirashon. Pero despues di algun luna el a keda motivá i tòg a skibi. Despues ta sigui e parti finansiero ku tin bia por ta difísil. Pa artistanan independiente voral esei ta difísil pasobra nan no tin kompania nan tras. Pero el a haña un hende ku ta kere den loke e tabatin i a invertí den e proyekto. Despues mester a haña kas pa filma, mester a haña e aktornan, den e pelíkula tin un mucha tambe i mester a tene kuenta ku e orarionan ku e por a filma, ya ku e tin di bai skol. Shelly a bisa ku dos di e muchanan ku a apliká a manda video i esun ku Shelly a gusta ta biba na Chicago i no na New York kaminda e grabashon mester a tuma lugá. Tabata un kibramentu di kabes kon ta hasi, si ta paga pa e mucha bin New York òf kiko pa hasi. Ta diferente pida pida kos segun Shelly mester a tene kuenta kuné ora ta produsí pelíkula.
Drenta den e emoshon di e karakter
Shelly a bisa tambe, ku tabata algu basta difísil e emoshon ku e tin di trese dilanti den e pelíkula. Den nos entrevista di 4 aña pasa tambe el a papia di esaki i awor el a amplia un tiki mas riba dje. Segun Shelly komo aktris bo tin di bai paden i buska e emoshon. E aktris ta su man, pia i emoshon e tin pa e trese e persona ku e ta aktua pe dilanti. E tin di pone su mes dilanti i konta e persona ku tin riba papel. E ròl den Thorn ta ku e loke e tabata pasando aden no ta fásil. E aktris den su ròl prinsipal tabatin un bista establesé i awor ta sosodé algu ku ta desbalans’é kompleto. I kiko awor, ta laga e bida pa esun di pasado. Tabatin un momentu den e filmashon ku Shelly a pèrdè rosea, e tabata bou di yoramentu. Dado momentu tabatin pouze ku nan a bai kome, papia i hari, pero ora di bai filma bek, e mester a drenta bek den e emoshon ku e tabata aden promé ku e pouze. E tabatin un bon direktor di e pelíkula ku tabata yud’e pa e drenta e emoshon bek. E filmashon ku otro esenanan mientras Shelly no mester a hasi nada pero tòg mester a keda den e emoshon ei. El a bisa Djasabra ku pa mei ora largu ku el a sinta warda, e mester a sigui yora i keda ku e moshon ei pa asina ora e filmashon ku ta toka su parti sigui, e por ta bek manera el a keda. Tabata basta difísil pasobra hopi bia ora hende ta tristu nan ke Sali mas lihé di loke nan ta aden pero den e kaso aki, e mester a keda hinka su mes bek den e situashon. E dia ei tabata unu basta pisa. Na fin di anochi Shelly dado momentu no tabatin ni forsa mas pa yuda nan ku e parti di ruim op. Tur hende tin nan manera di drenta den un karakter òf kon ta Sali afó. Den su kaso e ta gusta skucha muzik di naturalesa, manera para ta kanta. E ta kòrda ku e tabata skucha artistanan di Kòrsou, e ta gusta kansionnan di orashon meskos ku hasi orashon ta yud’e Sali afó di e emoshon ku e mester a drenta.
Un dushi sentimentu
Siendo un artista i tambe biba parsialmente na New York, Shelly a konta Djasabra ku e tin basta tempu hasiendo esaki i e ta sintié orguyoso pasobra el a logra, el a filma un pelíkula. Ta un emoshon ku e no por deskribí. E ta sumamente kontentu trahando ku koleganan ku e konosé i ku el a traha kuné den pasado tambe. I Shelly ta sintié masha dushi ku loke el a studia i e ta mira e frutanan di esaki. E pelíkula Thorn mes el a wak masha hopi bia i kada bes e tin e mesun emoshonnan. E ta hopi emoshoná i kontentu ku porfin e por laga hende wak e. E trailer
Thorn den Film Festival
Shelly tin pensa pa un dia skibi un pelíkula na Kòrsou. E ta algu great pa e hasi aki i e tin kontaktonan na Kòrsou ku tin e deseo aki. Meskos e ta spera di un dia por trese Thorn Kòrsou pa e komunidat di dje, su pais por wak. Ainda no por trese pasobra e pelíkula ta drenta Festival di pelíkula. I p’esei mes e no tin un premier pero e ta presente pa un grupo selektá. Thorn a keda selektá pa North Film Festival i e lo subi pantaya na North New Jersey un djis aki. I e ta wardando kontesta di un Film Festival mas i despues lo trese Thorn Kòrsou.
Ta ariba so mi por bai
Shelly a bisa ku e ke bai Merka bek, pasobra ta einan su oportunidatnan ta. E ke aktua i p’esei ta Merka e tin di bai pa hasié. E stima su trabou awor kai na LabdeMed pero su kurason ta ser aktris i na Merka. Ora e mira loke el a produsí, e ta konkluí ku ta ariba su e por bai. I e echo ku North Festival a skohe pa pasa den nan festival ta algu grandi pasobra ta pelíkulanan grandi ta den e tipo di festival aki.
Historia
Rachelle (Shelly) le Blanc a kaba New York Film Academy (NYC) ku un aña di aktuashon den konservatorio di pelíkula. E ta formando parti aktualmente di diferente obra na Merka, hasiendo su karera den aktuashon. Rachelle ta yu di Kòrsou ku 7 aña pasa a bai biba Merka, terminando su estudio di merkadeo, maneho di media i aktuashon. Despues di a gradua na NYFA, durante i despues di e programa di master el a aktua den diferente pelíkula di studiantenan, webseries i pelíkulanan independiente kòrtiku. Na 2017 el a keda nominá komo mihó aktris den “supportive role” pa Urban webseries Awards. Tambe e tabatin un ròl komo invitado den Daytime Emmy Nominated webseries Yough Love.
Deseo di ser aktris for di chikí
Rachelle a konta nos ku ta un trayektoria largu el a pasa dor. For di chikí semper el a bisa di ke bira aktris. Su amiga Krishna a kòrd’e un bia ku ta for di dia e tabata den 1ste klas, ku su seis aña el a bira ku ta aktris e ke bira. Rachelle a laga su mayornan komprondé ku ta Merka e ke bai studia pa e bira aktris profeshonal. Pero asuntu di Visa a want’e un poko i el a bai UNA na Kòrsou studiando maneho i despues si a bai Merka pa sigui den e área di maneho. Na Kòrsou el a haña su Bachelor i despues a bai pa su master na Florida kaminda el a biba 2 aña i mei i despues di tabata kla ku maneho el a bai pa aktris. El a muda pa New Jersey i a bai skol na New York.
