WILLEMSTAD.-Koriendo den outo i ta laga e radio scan nos a tuma nota ku 95.7MHz ta den aire. EXTRA a komprondé ku hustamente awe e stashon di radio a kuminsá transmití. Por papia di ZFM/Mi95, asina Orlando Cuales a konfirmá pa EXTRA.
E fundashon Stichting Curom ta doño di e pèrmit i frekuensia. Nan a kuminsá drai awe den un forma di ‘soft opening’. Por spera un emisora ku e potensia di Z86 kombiná ku e alegria di Mi95. Teniendo kuenta ku tempu a desaroyá ta pone ku e emisora nobo aki lo tin gran kantidat di inovashon, pasobra simplemente no por hasi kosnan manera ántes mas. Riba e pregunta spesífiko sr. Cuales a bisa ku Curom Broadcasting no te eksistí mas. E emisora nobo lo tin elemento di tantu Z86 komo Mi95. Mas aleu el a splika ku esaki ta un intento pasobra simplemente un pais no por keda sin su medionan di komunikashon pa tene su komunidat informá. Z86 Curom a stòp operashon despues di mas i 90 aña, algu ku sigur a kousa un impakto enorme.
Ta nèt den e dianan aki ku eksistensia di medionan di komunikashon ta na diskushon despues di tuma nota ku e korant Nobo a sera su portanan, ta surgi e informashon ku ZFM/Mi95 ta start. Asina tin mas desaroyo den e direkshon aki EXTRA lo informá esaki.