RABAT (AP).- Un rapero marokano, enkarselá pasobra el a skirbi un kansion den kua el a akusá polisnan di korupshon, a kuminsá un wèlga di hamber pa protestá pa e kondishonnan di prison, asina su ruman a bisa ayera.
E rapero marokano Muad Belghouat, konosí komo El-Haqed’ òf ‘E furioso’, a keda sentensiá dia 11 di mei pasobra el a ofendé sirbidónan públiko ku su kansion ‘Kachónan di Estado’.
Adrrahim Belghouat a bisa ku su ruman ‘tin prohibishon pa usa telefon den prison, e ta wòrdu persiguí pa otro presunan i e bewakernan tin kustumber di bai inspekshoná entre su ophetonan, generalmente hopi lat anochi’.
E wèlga ta un ‘atvertensia pa e atministrashon di e prison’, asina e ruman a bisa. El a agregá ku pa aworakí e wèlga lo dura 48 ora.
E abogadonan di Belghouat a apelá su sentensia ayera den un oudiensia, pero e kaso a wòrdu posponé te ku dia 23 di yüli pa e rapero tin mas tempu pa prepará su defensa.
Belghouat a partisipá aktivamente den e movementu pro demokrasia 20 di Febrüari. El a skirbi kansionnan den kua el a kritiká e rei pa su rikesa i otronan den kua el a suprayá e desigualdat den e sosiedat marokano, pero esun ku a krea mas skandal tabata “Kachónan di e Estado’.
E grupo defensor di derechinan humano Human Right Watch, ku sede na New York, a kondená e sentensia kontra Belghouat na mei, i a suprayá ku miéntras el a wòrdu enkarselá pa su kansion, Maroko a risibí artistanan internashonal manera Mariah Carey i Lenny Kravitz den e festival Mawazine.
Maroko a wòrdu sakudí pa un ola di manifestashon na fabor di demokrasia aña pasá, pero kontrali na otro paisnan di Medio Oriente, rei Mohammed VI a logra keda na poder ora el a eskivá e malkontentu popular ku un seri di reformanan legal.
