WILLEMSTAD.- E rapòrt riba e rampa na Playa di Kenepa ku a kousa bastante konsternashon den komunidat, ta kla i awor ta na SOAB pa su finalisashon. Esaki ta loke ku minister sra. Zita Jesus-Leito a duna di konosé na EXTRA.
Ta for di algun siman e rapòrt ku a keda trahá pa un tim di ámtenar ta kla i awor a bai SOAB pa atendé ku e parti di finansiero.
Sra. Jesus-Leito no kier a bai den detaye dje rapòrt, konsiderando ku esaki no ta kla ainda, pero si nos a komprondé ku e tres ámtenarnan ku lo ta metí den e kaso aki, lo a traha riba nan mes.
For di novèmber ku tabatin e konsternashon pe rampa na playa di Kenepa, p’e bista mahos ku e tabata duna, minister Jesus-Leito a para e konstrukshon, pasobra no tabatin ningun pèrmit di konstrukshon, i e minister no tabata na altura di konstrukshon dje rampa.
Den fin di yanüari di e aña aki a logra di desmantelá e rampa kompleto. For di novèmber, minister a instituto un tim di ámtenar pa traha riba e rapòrt dje rampa, p’asina duna klaridat ta kon e proseso pa konstrukshon dje rampa a kana i yega asina leu.
Awor aki e rapòrt ta na siguiente stap ku ta SOAB pa kontròl finansiero i diferente aspekto mas. Ora SOAB ta kla ta bai wak kiko ta e siguiente stapnan. E mandatario ta spera ku otro siman SOAB ta kla ku e rapòrt.
E mandatario a indiká ku ketu bai e ta kere den aksesibilidat ne playa pa hendenan desabilitá. E ta kere ku mester tin un manera pa e hende por yega e playa, kisas pa outo baha na e sitio i baha e persona desabilitá.
Pa loke ta trata e tres trahadónan ku ta envolví den e rampa, ketu bai tin prohibishon entrada na ofisina di UO (Openbare Werken).
Manera ta konosí e rampa na e playa a kousa konsternashon den komunidat, debí ku hopi hende tabata di pensamentu ku el a daña e bista bunita dje playa. Playa Kenepa ku mundialmente ta ser promové komo un di nos playanan di mas bunita dje isla i dushi.
E motibu di prohibishon di drenta tur lokalidatnan di UO ta debí na e ròl ku nan a hunga den konstrukshon ilegal (sin pèrmit) dje rampa. Pasobra nan a hasi òf krea e impreshon ku e rampa a haña aprobashon di minister i ku nan lo tin outoridat pa representá minister den konstrukshon dje rampa.
