RAUL CASTRO; na edat di 95 aña ainda su opinion i bos ta konta na Cuba.
LA HABANA, Cuba (AFP).- E eks presidente kubano Raúl Castro, di 95 aña i kende nan no a mira den públiko ya pa bastante luna, a reaparesé ayera durante di un akto na La Habana ku motibu di sentenario di su ruman Fidel Castro. Bistí ku su unifòrm oleifi bèrdè, Raúl a risibí ovashon ora ku el a drenta e teater Karl Marx di La Habana kaminda tambe tabata presente e presidente Miguel Diaz-Canel i demas mandatarionan dje Partido Komunista.
Raúl a tuma asiento banda dje biuda di Fidel, Dalia Soto del Valle, kende na masha poko okashon ta aparesé den aktonan públiko. Ounke ku Raúl Castro no ta okupá ningun funshon den gobièrnu ni den e partido, el a keda ku un papel importante den desishonnan polítiko i tin e lealtat di forsanan armá.
Den luna di yüni último, e presidensia di Cuba a informá ku Raúl a duna su aprobashon pa un pakete di reformanan ekonómiko pa enfrentá krísis, esaki bou di preshon di Merka. E medida ta representá e kambio di mas grandi dje modelo polítiko ku Cuba a adaptá for di entrada di komunismo komo 70 aña pasá.
E último aparishon públiko di Raúl Castro tabata dia 1e di mei dilanti di embahada di Merka na La Habana, kaminda el a mustra hopi frágil.
E ruman mas chikí di e defuntu Fidel Castro (1926-2016), enemigu hurá di Merka, den luna di mei último a keda akusá na Miami pa morto di kuater norteamerikano kendenan a pèrdè na bida ora ku a tumba nan avion den 1996. E tempu ei Raúl Castro tabata minister di defensa.
E medidanan di seguridat adoptá pa organisadónan den e teater Karl Marx a stroba periodistanan, inkluso fotógrafonan, di move for dje sitio kaminda nan a keda ubiká.
