RCO ta lansa #5: “Fin di Aña ta Kòrsou”

WILLEMSTAD.- Ayera Randal Corsen Orchestra (RCO) a lansa un tumba-tambú ku e título apropiá pa e temporada aki: ‘Fin di Aña ta Kòrsou’.
E piesa nobo aki ta interpretá un biaha mas pa e tres kantantenan prinsipal di RCO ku ta Dibo D, Rich Pieter i Yumarya Grijt. E piesa aki ta otro kolaborashon entre Randal Corsen i Dibo D.
E letranan tabata ta na enkargo di Dibo D, melodia ta di Dibo huntu ku Randal ku ta responsabel tambe pa e areglo. E piesa ta papia di e echo ku pa fin di aña ta na Kòrsou bo mester ta: “Bisa kiko ku bo ke, puntra ken si bo mester, bo wak pariba wak pabou, fin di aña ta Kòrsou”.
PROYEKTO
E piesa aki ta klousura di e proyekto di grabashon ku RCO a inisiá aña pasá ku aporte finansiero di Prins Bernhad Cultuurfonds Caribisch Gebied. RCO ta sumamente agradesido pa e yudansa ku el a haña di PBCCG. Asina Randal Corsen a realisá su deseo di por duna su aporte na músika popular di Kòrsou, grabando 5 produkshon original den diferente género popular lokal.
Anke Randal ta un músiko ku a destaká riba tereno di jazz (entre otro komo e promé ganador Antiano di un Edison Award na Hulanda) i den músika klásiko (entre otro komo e promé kompositor di un ópera kantá kompletamente na Papiamentu), tòg semper su amor pa músika popular di Kòrsou a keda.
Ultimo añanan el a demostrá esei – aparte di vários presentashon ku su mes banda RCO – entre otro ku su partisipashon komo areglista na Festival di Tumba, kaminda e aña aki el a resultá di ta e areglista di e tumba ganador di Dibo D.
‘Fin Di Aña ta Kòrsou’ ta e di sinku i último piesa ku RCO lo lansa den e proyekto di grabashon aki, pero esei no ke men ku no por spera nada nobo mas di RCO. E proyekto di grabashon aki a kuminsá na òktober aña pasá ku lansamentu di e piesa den género di ritmo kombiná titulá ‘Dushi Sintimentu’, interpretá pa Dibo D. Na desèmber di e mesun aña a lansa e tumba titulá ‘Un Dia Nobo’ interpretá pa Rich Pieter. Despues a dura un ratu promé ku e siguiente piesa a sali: ‘Mi Bon Amigu’ interpretá pa Yurmarya Grijt. Djis despues a lansa e montuno ku ta zonando ketu bai na e radio emisoranan titulá ‘Mi’n ta Gaña’, interpretá pa Dibo D.
Tur e piesanan original di RCO lo bai zona tambe dia 28 di desèmber awor durante e di 6 edishon di e Paranda di Fin di Aña ku dia 28 di desèmber tin na Landhuis Brakkeput Meimei. No pèrdè esaki, pasobra e lo bira un éksito meskos ku tur e añanan anterior.

SHARE

LEAVE A REPLY