WILLEMSTAD.-E kompania anónimo di gobièrnu Refineria di Korsou (RdK) den un informe a duna informashon riba un asuntu ku tin bastante hende den e komunidat aki pendiente. Djabièrnè último tabata e último fecha riba kua partidonan ku tin interes di sigui negoshá ku RdK pa bira operadó di e refineria na Korsou por a entrega nan proposishon fiho òf manera RdK ta yam’é e proposishon obligatorio (binding proposal).
No solamente e trahadónan, eks trahadónan di Isla i esnan di kontratista pero hopi otro sektor ta masha pendiente di desaroyonan pa loke ta trata futuro di e refineria. Den un nota dia 11 di desèmber último RdK a informá ku a move e fecha pa 18 di desèmber 2020. RdK ta informá awor ku nan a risibí 3 oferta fiho di e partidonan interesá. RdK lo bai analisá e tres ofertanan aki ku e intenshon pa skohe un partner preferensial pa e fasilidatnan petrolero di Korsou.
Mesora despues lo kuminsá ku negosiashonnan ku intenshon pa yega na un akuerdo final pa fin di febrüari 2021.
