RdK i PDVSA dispuesto pa traha huntu den proseso transishon Isla

Trabounan di mantenshon tambe entrante yanüari 2020

WILLEMSTAD.- Petroleos de Venezuela (PDVSA) i Refineria di Korsou (RdK) ta dispuesto i lo traha huntu riba un periodo di transishon na momentu ku e aktual kontrakt finalisá na fin di 2019.

Esaki ta resultado di e reunion ku a tuma lugá djasabra dia 30 di novèmber último entre presidente di PDVSA, Sr. Manuel Quevedo i un delegashon di RdK, enkabesá pa Sr. Marcelino De Lannoy, na Caracas, Venezuela. Partidonan a kumbiní ku lo realisá un periodo di transishon ku mester resultá den garantia di empleo pa empleadonan ku aktualmente ta laborá na Refineria Isla entrante yanüari 2020. Meskos a papia riba e posibilidat pa entamá trabounan di mantenshon di tal forma ku kontratistanan tambe tin trabou i nos ekonomia en general lo tin mas probecho durante di e periodo di transishon. En prinsipio a akordá un durashon máksimo di un aña pa e periodo di transishon.

Hopi importante den esaki ta ku tur lokual ku partidonan hasi mester ta den e kuadro di posibilidatnan ku e lisensia di eksonerashon ku RdK a risibí resientemente di Office for Foreign Asset Control (OFAC), ta duna. PDVSA i RdK lo traha huntu pa asina krudo por yega nos Refineria Isla i plantanan di nos refineria pronto ta den operashon.

SHARE

LEAVE A REPLY