Minister Cijntje a pone su posishon riba mesa
WILLEMSTAD.- Ni oumento di tarifa di koriente ni aplikashon di un programa di “schakel” kada 2 ora ta aseptabel pa minister di Desaroyo Ekonómiko, Ruisandro Cijntje. Esaki el a deklará pa Extra riba preguntanan relashoná ku e impase ku a surgi den e deliberashonnan entre Aqualectra, Refineria di Kòrsou (RdK) i Global Oil riba uso di turbinanan di gas di Curaçao Refinery Utilities (CRU) pa Aqualectra risibí èkstra kapasidat.
Na opinion di Cijntje RdK mester sea kubri tur lokual ku Global Oil ta kobra mas tantu ku e tarifa usual ku Aqualectra ta paga òf RdK mester bai mesa i renegoshá e akuerdo ku Global Oil. E minister ta bisa ku el a hasi su punto di bista konosí tantu na Konseho di Minister komo na partido Nashonal. Otro siman e tópiko aki lo ta na diskushon den reunion di Konseho di Minister.
Cijntje ta bisa ku e kòmbersashonnan entre Aqualectra i RdK riba uso di turbina di gas di CRU ora tin falta di kapasidat debí entre otro na kalor ku ta hasi, tabata kana bon. Esaki te ora ku Aqualectra a komprondé ku RdK a pasa maneho di e turbinanan di gas pa e kompania Global Oil i e kompania aki a presentá ku eksigensianan di pago ku no ta aseptabel pa Aqualectra.
Cijntje ta mustra ku ta trata aki di turbinanan di gas ku Kòrsou a paga pe tempu ku a traha e sentral di BOO. Ku RdK den un di su kartanan ta bisa ora el a traha e dil ku Global Oil pa produkshon di asfalt el a pasa e instalashonnan di CRU tambe i no tabata na haltura ku Aqualectra ta hasi uso di esakinan, segun Cijntje simplemente no ta kuadra ku bèrdat.
“Esaki ta un deklarashon simplemente pa trata di skapa nan kurpa. Si tin un kompania ku mester sa ku Aqualectra ta hasi uso regular di e turbinanan ta RdK. Tur biaha den temporada di kalor ku mester di kapasidat èkstra, òf ora ku mester hasi revishon grandi na mashinnan di Aqualectra òf ora surgi un interupshon grandi den suministro di koriente manera un “black out”, Aqualectra ta hasi uso di e turbinanan di gas”, Cijntje ta sigui bisa.
Kon por ta posibel ku RdK a negoshá un akuerdo ku Global Oil sin ku a firma un tipo di “government agreement” kaminda ta sera akuerdonan alabes ku otro kompanianan manera Aqualectra, KTK, Curoil i asta servisio di impuesto, Cijntje ta bisa ku e no sa. “E asuntu aki no ta bou di mi kartera pues mi no por bisa kon ni kiko a negoshá.”
E minister ta reiterá ku no mester lubidá ku e turbinanan di gas ta algu ku pueblo mes a paga pa nan. “Na 2010 a traspasá e turbinanan plùs tur akshon di Aqualectra den BOO pa Refineria di Kòrsou. Esaki tabata motibu pa a tene un enkuesta sivil i korte a yega na e veredikto ku e desishon di 2010 tabata un akto di mal gobernashon.”
Pa aworakí Rdk a pasa e turbinanan di gas pa un otro kompania, segun Cijntje ta otro akto ku no ta korekto. “Anto RdK su aktitut ta ku e ta wak su toko anto Aqualectra asumí su responsabilidat i wak kon e ta kumpli ku demanda pa koriente tampoko ta korekto. Den un pais chikí manera Kòrsou kosnan no por funshoná asin’aki.”
Foto:
…Minister Ruisandro Cijntje…
