1200 hende laborando aktualmente riba tereno refineria
WILLEMSTAD.-E kompania 2Bays (RdK) a dal un paso importante atrobe den e trayekto pa habri e refineria di Kòrsou. Sinku aña pasá a sera e entrada prinsipal di e refineria, Post-5, despues ku PDVSA a bandoná Kòrsou i e kantidat di trabounan a baha konsiderablemente. Na palabra Patrick Newton, direktor interino di 2Bays awe mainta na momentu ku e realisá e akto ofisial pa habri e entrada aki bèk.
Tabatin bastante hende na Post-5 pa presensia e momentu importante aki. Por a mira trahadónan, pero tambe eks trahadónan i asta penshonadonan ku tambe tabata presente.
Newton a sigui bisa ku a mantené un entrada so, ku ta Post-7 ya ku no tabatin muchu aktividat mas riba tereno di e refineria. Awendia kosnan a kambia i ta sigui kambia. Alrededor di 1200 hende ta laborando aktualmente, tur dia, riba tereno di Isla. Tin 270 trahadó di CRU i banda di esei e kompanianan Aqualectra i Curoil, kada unu ku por lo ménos 100 persona trahando. Mas ku mitar di e total menshoná ariba ta trahadónan di kontratista.
Importante ta ku Global Oil ta buskando trahadó, nan tin mester di 320 trahadó di fishi. 40 kompania tin un kontrakt pa traha riba tereno di Isla. Newton a yama danki na e kompanianan Global Oil i Oryx Midstream ku ta invirtiendo algun mion pa realisá e trabounan aktual.
