PARIS, Fransia (AFP).- Dirigentenan for di praktikamente rònt mundu a felisitá Donald Trump, kende entrante ayera a kuminsá su di dos periodo komo Presidente di Merka. Ta trata dje regreso polítiko mas ekstraordinario di historia resien di Merka i di un èks-Presidente ku nunka a rekonosé su derota den aña2020, kende a primintí di ”tuma bengansa” riba su atversarionan i a keda kondená di forma penal, ademas di tabata blanko di dos intento di asesinato.

ISRAEL
E Promé Minister israelí, Benjamin Netanyahu, a felisitá Trump, primitiendo ku “e mihó dianan” dje aliansa entre ámbos pais ta bai yega. “Mi ta kere ku traha huntu lo hiba e aliansa Merka-Israel na nivelnan ainda mas grandi”, segun el a agregá.
RUSIA
E Presidente ruso, Vladimir Putin, a felisitá su kolega norteamerikano i a deklará di ta “habrí pa diálogo” riba Ukrania pa logra un “pas duradero”, kasi tres aña despues di a invadí e èks-republika soviétiko.
“Mi ke asentuá ku e meta no mester ta un periodo kòrtiku sin atakenan, sino un pas duradero”, el a deklará.

UKRANIA
E Presidente ukraniano, Volodimir Zelenski, a felisitá Donald Trump i a ekspresá e speransa ku e presidente nobo lo yud’é pa alkansá un “pas huntu i duradero” den e konflikto den Ukrania.
“Presidente Trump semper ta desisivo i e polítika di pas traves di forsa ku el a anunsiá ta brinda e oportunidat di reforsá liderazgo norteamerikano i logra un pas hustu i pa largu plaso, ku ta e prioridat máksimo”.

UNION EUROPEO
Unión Europeo ta spera di mantené un “kolaborashon estrecho” ku e mandatario norteamerikano nobo dilanti di “desafionan global”, segun e presidente di Komishon Europeo, Ursula von der Leyen, refiriendo na e “forsa duradero di e asosiashon transatlántiko”.
“Huntu, nos sosiedatnan por logra mayor prosperidat i fortalesé su seguridat komun”, segun el a bisa.
CANADA
“Nos ta mas fuerte ora ku nos aktua huntu”, segun e Promé Minister canades, Justin Trudeau, felisitando Trump.
“Canada i Merka ta mantené e asosiashon ekonómiko mas fruktuoso di mundu i ta e promé sosio komersial di esun pa e otro”, segun e hefe di gobièrnu canades a rekordá ku e temor ku e Presidente norteamerikano ta kumpli ku su menasa di imponé impuesto di 25% riba produktonan for di Canada.
ALEMANIA
E hefe di gobièrnu aleman, Olaf Scholz, a deseá pa e “bon relashonnan transatlántiko
por sigui ku Merka, e “aliado mas serka” di Alemania.
“Awe, e Presidente Donald Trump ta den funshon. Pabien! Merka ta nos aliado mas serka i e meta di nos polítika ta pa sigui mantené bon relashon transatlántiko. Union Europeo, ku tin 27 miembro i mas ku 400 mion persona, ta un union fuerte”, segun e dirigente a skibi.
INDIA
E Promé Minister indio, Narendra Modi, a felisitá su “kerido amigu” Donald Trump, i a bisa di ta “impasiente” pa “un biaha mas por traha estrechamente” ku e republikano pa “duna forma na un mihó futuro pa mundu i ku lo benefisiá e paisnan di nos dos”.
ITALIA
E Promé Minister italiano, Giorgia Meloni, a manda su “mihó deseonan” pa Donald Trump. “Mi tin sigur ku e amistat entre nos nashonnan i e balornan ku ta uni nos lo sigui reforsá e kolaborashon entre Italia i Merka”, segun e dirigente ultraderechista a skirbi riba retnan sosial, suprayando e papel di Italia den “konsolidashon dje diálogo entre Merka i Europa”.
REINO UNI
Rei Charles III a manda un mensahe personal di felisitashon na Donald Trump, den kua e ta hasi referensia na e “relashon spesial i duradero entre Reino Uni i Merka”.
BRASIL
E Presidente iskierdista ei, Luiz Inácio Lula da Silva, a ekspresá su deseo pa Merka sigui ta un “sosio históriko” di Brasil durante e gobièrnu dje republikano Trump, aliado di su rival ultraderechista Jair Bolsonaro.
“Nos no ke pelea, ni ku Venezuela, ni ku merikanonan, ni ku China, India of Rusia”, segun Lula a deklará.