PALESTINA (AFP).- Qatar, un dje prinsipal mediadónan entre Hamas i Israel, a anunsiá di a risibí un reakshon “positivo” dje movementu islamita palestino riba un proposishon pa para e guera, ku ta inkluí liberashon di rehennan ku nan tin den Gaza.
E anunsio ta koinsidí ku e bishita na Qatar dje sekretario di estado norteamerikano, Anthony Blinken, kende ta riba gira den Medio Oriente na momento ku e guera ta serka di drenta su di sinku luna.
E atakenan israelí a sigui ayera konsentrá riba Jan Yunis i Rafah , den zùit dje teritorio palestino. Segun e Ministerio di Salú di Hamas, sigur 107 persona a muri den último 24 oranan den Gaza.
“Nos a haña un kontesta di Hamas relashoná ku proposishon pa ku e rehennan. E reakshon ei ta konta ku algun komentario, pero en general ta positivo”, segun e promé minister di Qatar, Mohammed bin Abdelrahman Al Thani den un konferensia di prensa na Doha huntu ku Blinken.
I ounke el a sigurá di ta optimista, el a nenga na papia riba e detayenan dje kontesta di Hamas, ku di su parti a konfirmá di a presentá su reakshon na e mediadónan, Egipto i Qatar, pero sin spesifiká e kontenido.
Blinken a bisa ku e kontesta a keda komuniká na e israelínan i ku lo e diskutí esei durante di su bishita awe na Israel komo parti di su gira pa Medio Oriente, e di sinku for di 7 di òktober.
Siman pasá, un fuente dje movementu palestino a bisa ku e proyekto di pas den tres fase ta inkluí ku pa seis siman ta stòp e guera durante kua Israel mester liberá entre 200 i 300 prezu palestino a kambio di entre 35 pa 40 rehen den poder di Hamas i tambe fasilitá yegada di mas yudansa humanitario na Gaza.
