CLEVELAND, OHIO, MERKA, AP.- Un redaktor ku ta traha pa e empresa di Donald Trump a bisa djárason ku el a kometé un eror i a diskulpá pa usa frasenan di un diskurso di Michelle Obama ku el a usa na aña 2008 den e mensahe ku Melania a duna den e Konvenshon Nashonal Republikano.
Den un komunikado publiká pa e kampaña, Meredith McIver a asumí e responsabilidat pero a indiká ku Melania Trump tabata sa ku e fragmentonan tabata di e diskurso di Michelle Obama.
“Un persona ku semper mi a gusta ta Michelle Obama”, asina McIver a bisa tokante Melania Trump.
” El a lesa algun fragmento di e diskurso di Michelle Obama komo ehèmpel.
Mi a skibi nan i despues mi a inkluí algun frase ku na final a terminá komo e diskurso final”.
E frasenan en kuestion tabata parti di e komienso di e diskurso di kasi 15 minüt di Melania Trump.
McIver, kooutor di algun buki di Donald Trump, a bisa ku el a ofresé su renunsia, pero e kandidato presidensial republikano no a aseptá esaki.
