Refineria mester haña koriente urgente pa suministrá Aqualectra mes i aviashon

WILLEMSTAD.-E korto sirkuito den Curaçao Refinery Utilities (CRU) di ayera ku a laga hinter Korsou pa hopi ora sin koriente, a laga algun bario sin koriente te awe mainta. EXTRA a papia ku habitante di Kaya Kazèrne ku te awe mainta 9’or no tabatin koriente. E trahadónan di Aqualectra ta trahando duru for di ayera mainta despues di e kaso ku e transformator. Aqualectra tin komo prioridat pa duna koriente na komunidat, sinembargo refineria tambe tin mester di sufisiente koriente pa sigui operá. Sin koriente refineria no por manda jet fuel pa aeropuerto i no por manda fuel ni pa Aqualectra mes.

Bosero di Refineria Isla Earl Balborda…

E situashon ku a surgi ta hopi delikado. Buskando informashon riba esaki EXTRA a topa ku algun realidat. Na prome lugá ta asina ku ta Isla ta suministrá Aqualectra ku fuel pa nan prosesonan di produkshon di awa i koriente, pues na momentu ku Isla no tin koriente e refineria no por manda fuel pa Aqualectra. Despues di e kaso di ayera Aqualectra a konsentrá riba komunidat i laga refineria den man di CRU, ku ta e kompania ku mester suministrá Isla ku awa, koriente, stom etc. E situashon aktual ta ku CRU no ta produsiendo nada pa Isla i p’esei Isla no tin koriente. Bosero di Isla sr. Earl Balborda a konfirmá pa EXTRA ku tin kòmbersashonnan ta tumando lugá ku Aqualectra i tin palabrashon ku e direktor pa asina Aqualectra por krea espasio pa suministrá Isla tambe ku koriente.

Un otro situashon delikado ta jet fuel. Ta Isla ta pòmp jet fuel manda aeropuerto pues sin koriente Isla no por kumpli ku esei. Curoil ta importá Jet fuel, pero ta Isla mester pòmp i mand’é Hato.

Yenamentu di bòter di gas pa kushina no ta un problema ainda. Tin sufisiente gas pa kushina, pero debí ku no tin koriente Isla ta kima e gas aki loke ta nifiká pèrdida. E speransa tei ku bastante lihé Aqualectra lo por logra suministrá Isla ku koriente pa asina e prosesonan por sigui sin kousa mas difikultat.

SHARE

LEAVE A REPLY