Un persona tumando nota di su kas ku a kima
LEGE-CAP-FERRET, FRANSIA, AFP.- Personanan afektá pa un kandela di mondi enorme na Fransia a kuminsá mira mehorashon den e situashon. Outoridatnan a informá djabièrnè ku bomberonan a logra stabilisá un kandela enorme ku tabatin 9 dia kimando.
Mayoria di e 220.000 personanan evakuá ya por a bai nan kas bèk. “E krísis no a kaba i e kandela ainda no ta bou di kòntròl, pero nos ta avansando”, asina un funshonario a bisa.
Pero un otro kandela na sùitost di Var a bira mas grandi, i ta menasando barionan 80 kilometer na nortost di Marseille. 2.500 persona a keda evakuá.
E rafaganan fuerte di bientu a hasi e situashon mas pió. E kandela a amplia rápidamente i kima 1.000 hèktar den algun ora, segun ofisialnan a bisa.
Sentenáres di bombero a keda desplegá huntu ku avionnan i helikòpter.
Temperatura a subi na 38 grado Celsius na Var, kual ta bou di alerta oraño pa e ola di kalor.
Transporte di kombustibel, i tur lusafè i laiter ta prohibí pa usa pa sende stof te ku djaluna mainta.
Den region di Gironda, outoridatnan i habitantenan ainda ta sigui evaluá dañonan kousá pa un kandela ku a kima 42.000 hèktar.
Outoridatnan a informá ku e kandela a keda stabilidat debí na kondishonnan faborabel den oranan di anochi.
Por lo ménos 200 kas a kima i dos bombero a muri.
