KIEV, UKRANIA, AFP.- Djabièrnè e referèndem pa aneksá na Rusia a kuminsá den kuater region ukraniano kontrolá total òf parsialmente pa Moscow. E lidernan di G7 a bisa ku lo no rekonosé e regionnan komo parti di Rusia.
E referèndem, konsiderá komo “falsu” pa Ukrania i Oksidente ta empeorá e konflikto ku a kuminsá riba 24 di febrüari.
“Nos lo no rekonosé e referèndem i nos lo no rekonosé e aneksashon si esaki sosodé”, asina e lidernan di G7 (integrá pa Merka, Alemania, Fransia, Reino Uní, Canada i Hapon) a bisa.
Pa loke ta Nashonnan Uní, e komishon di investigashon di e organisashon na Ukrania, a indiká ku a bishitá 27 siudat i a interogá mas ku 150 víktima i testigu, i a konstatá ku Rusia “a kometé krímennan di guera” den e pais.
Sinembargo, e krítikanan internashonal i di Kiev no a impedí ku Moscow ta kontinuá ku su referèndemnan na Ukrania.
E votamentu den regionnan di Donetsk, Lugansk, Kherson i di Zaporizhzhia a kuminsá 5 or di mardugá djabièrnè i lo tuma lugá te ku 27 di sèptèmber.
