Tròm ta saka Tròm
WILLEMSTAD.- E reklamo ku polítiko Javier Silvania(MFK) a lansa resientemente den direkshon di notarionan a tira lus riba e situashon robes ku ta eksistí den e aparato publiko. Anteriormente e asosiashon di notarionan a emití un reakshon den kua ta refutá e deklarashonnan di e polítiko. EXTRA mester indiká ku e ‘bala a sigui lora’ pasobra mas informashon ta saliendo na kla den e kuadro aki.
Un splikashon mas profundo di e kaso ta demostrá ku notarionan ta retené impuestonan atrasá na momentu di benta di un propiedat i ta paga esaki na Inspekshon di Impuesto. Esaki ofisialmente ta tarea di Gobièrnu, pero ku notarionan ta tuma riba nan. Lamentabel ta ku e tardansa ku e pagonan di e impuesto retené ta bini debí ku ku e instansianan konserní, manera Inspekshon di Impuesto, no tabata duna e informashon nesesario pa notarionan por hasi e pagonan di e impuesto retené.
Banda di esaki tambe ta importante pa hasi menshon di e echo ku Inspekshon di Impuesto no ta registrá e pagonan hasí korekto i komo konsekuensha di esaki ta keda presentá klientenan/siudadanonan ku ‘aanmaning’ i ‘navorderingsaanslagen’. Tin hopi kaso kaminda ta paga impuesto riba un ‘aanslagnummer’, pero esaki no ta keda registrá korekto. Por konkluí aki ku e sistema di registrashon di pago di impuesto ta laga hopi di deseá. Ehèmpel ta e kaso kaminda notario ta ripará ku e bendedó di propiedat tin OZB atrasá na balor di 50 mil florin, miéntras segun servisionan di impuesto e persona tin solamente un debe di 1500 florin na erfpacht. Tur hende ta obligá na paga impuesto.
For di e nota ku notarionan a emití por saka afó ku notarionan ta yuda ku e kobransa dor di retené impuestonan atrasá i paga esakinan na Inspekshon di Impuesto. No ta akseptabel ku personanan ku ambishon polítiko ta ataká notarionan kaminda ku nan ta duna aporte pa kobra impuestonan serka klientenan i paga esaki na Ofisina di Impuesto. Ta di spera ku lo por hana rekomendashonnan di sr. Silvanie dado kaso e drenta Parlamento.
