WILLEMSTAD.- Tur e “regalonan” ku gobièrnu ta parti último lunanan den forma di fiesta pòrnada, bónùs di fin di aña, bashí premi i karchi pa ‘jump-in’ ta kosmétika. Asina vise presidente di sentral sindikal SSK, Werndell Muelen, ta opiná. E ta bisa ku ta tarea di sindikalismo pa konsientisá trahadónan pa asina nan wak mas leu ku nan nanishi ta largu.
“Ta meskos ku un hende muhé ta pinta su kara bunita pa un dia pero e siguiente dia e no tin e ‘make-up’ ei mas na su kara”, Muelen a bisa den e ‘podcast’ riba plataforma di EXTRA: “Un ratu ku Gino”. No tin un sindikato òf organisashon ku ta sali na interes di e trahadó ku ta bisa ku e trahadó pa no tuma e regalonan akí pero e sindikatonan mester splika e trahadónan semper ku kosnan ku ta risibí pa un biaha so no ta kosnan struktural, Muelen ta splika. “Si bo pinta kara awe mainta, bo mester ta konsiente ku bo ta lanta ku bo kara mahos manera semper e siguiente dia.”
Muelen a para ketu na e sektor públiko bisando: “A duna bashí premi aworakí, pero aki ratu ora pidi un oumento di plaka di fakansi, bónus i struktura salarial nobo di forma struktural pa no bin bisa mi ku a paga bashí premie kaba. Si no ta bakoba pa kue makaku. Ta esaki ta konsientisá miembronan.”
E vise presidente di SSK ta mustra mas aleu ku no ta tende trahadónan di NV-nan di gobièrnu ta reklamá ku nan no a haña bashí premi pasobra sindikatonan a negoshá na mayoria NV e pago akí struktural den nan kontrato kolektivo. Pa loke ta sektor privá tambe, kaminda trahadónan no tin representashon sindikal, Muelen ta bisa ku ta vigilá gobièrnu di aserka. “Si gobièrnu ta paga bashí premi den su ròl komo doño di trabou no tin nada kontra esei pero si ta apliká pago di bashí premi den un ròl sosial, esei si no ta korekto.”
E trahadónan den sektor privá ta traha duru i paga impuesto pero nunka ta bini un señal di gobièrnu pa nan tambe, segun Muelen. “Ta yega un dia ku e trahadónan akí ta bai demostrá polítika ku esei no por.” Muelen ta sigui bisa ku tin polítiko no ke pa sindikato papia e kosnan akí pero ta responsabilidat di sindikatonan pa konsientisá trahadónan pa paga tinu, wak mas leu ku nan nanishi ta largu i paga tinu riba kosnan struktural i kosnan ku tin di aber ku nan penshun.
E ta mustra mas aleu ku parlamento a pasa un lei di penshun básiko obligatorio pero te ainda no por publiká e lei. Algu ku a boga hopi aña p’é. “Ta kiko ta e problema ku no a publiká esaki ainda?”
Na su opinion mester publiká e lei si no aki 5 òf 10 aña hopi hende lo mester biba solamente di un penshun di behes pasobra no a sòru pa un penshun general. “Tur e hendenan aki lo keda den e proseso laboral komo bewaker i trahadó di supermerkado te ku nan 70 i 75 aña pasobra no tin penshun. Sindikato ta yuda pero gobièrnu mester kambia leinan i tambe dialogá pa asina buta kosnan kambia pa mihó.”
Foto:
…Wendell Muelen…
