DETROIT, AP.- Reguladornan merikano di seguridat ta pidiendo e fabrikante di outo eléktriko Tesla pa detayenan riba e forma kon su sistema outopiloto ta funshoná i motibunan dikon esaki no a detektá un trèktòr den una aksidente fatal ku a tuma lugá den luna di mei na Florida.
Atministrashon Nashonal di Seguridat di Tráfiko (NHTSA), a pidi informashon riba tur e aksidentenan ku tabatin desde ku e sistema no a funshoná manera mester ta dia 7 di mei, na momentu ku un outo a dal den un trèktòr.
E agensia ta investigando e aksidente ku a tuma lugá na Williston, Florida, kual a kousa morto di Joshua Brown, di 40 aña, residente di Canton, Ohio. Tesla a bisa ku e kámaranan di su Modèl S di kuater porta no a distinguí e diferensia entre e parti blanku di un trèktòr ku tabata lorando i e shelu briante i no a brek outomátikamente.
E agensia a duna Tesla te 26 di ougùstùs pa entregá e dokumentonan. E empresa ta enfrentá un but di 21.000 dòler pa dia, te un máksimo di 105.000 mion si e no kumpli ku e pedido.
Ounke e agensia kalifiká e problema di e sistema outopiloto komo un “defekto” un bosero a bisa den un komunikado ku no a determiná si tin fayonan di seguridat. E pedido di informashon ta un paso di rutina di e investigashon, segun bosero Bryan Thomas.