LONDRES (AFP).- Rei Charles ayera a kuminsá ku “un proseso formal” pa despohá su ruman, prens Andrew, di su “títulonan i honornan”. Prens Andrew ta bou di investigashon pa su relashon ku e finansiero norteamerikano i “pedo kriminal Jewffrey Epstein.
“Prens Andew for di awor lo ta konosí bou dje nòmber Andrew Mountbatten Windsor”, segun un komunikado di Buckingham Palace. Ademas, Andrew mester bandoná su residensia real, Royal Lodge. “A entregá un notifikashon ofisial pa e renunsiá e kontrakt, i lo e muda pa un kas privá”, segun e mesun fuente.
E di dos yu di Elizabeth II, di 65 aña i kende ta biba huntu ku su eks-kasá, Sarah Ferguson, den un mansion di 30 kamber for di 2003, lo trasladá pa e finka di Sandringham Estate, na Norfolk, ku ta keda na 180 km nortost di Londres, segun e agensia Press-Association.
Den último lunanan e preshon a bira mas fuerte pa Andrew bandoná Royal Lodge, ku ta keda riba e propiedat real di Windsor, i mas ainda despues ku siman pasá a publiká memorianan póstumo di Virginie Giuffre, akusado prinsipal di Jeffrey Epstein. Den e buki, Giuffre ta konta ku el a keda usá dor di Epstein komo katibu seksual. Epstein a kometé suisidio den prizòn den 2019 promé di a keda husgá, i nan a bisa ku e tabatin relashon na tres okashon ku prens Andrew.
