Felipe VI, Rei di Spaña, a ekspresá su mes konta di sufrimentu insoportabel di hendenan den Gaza.
MADRID (AFP).- Rei di Spaña, Felipe VI, a denunsiá e krísis humanitario “insoportabel” den Gaza, ku a provoká “sufrimentu di algun shen mil hende inosente”. El a hasi esaki den un diskurso durante di un biahe pa Egipto. Felipe VI a deklará ku e último episodio dje konflikto aki, ku a start ku e atake di Hamas den Israel riba 7 di òktober di 2023, “a degenerá den un krísis humanitario insoportabel, e sufrimentu di algu shen mil hende inosente i e devastashon total di Gaza”.
“E biahe aki ta tuma lugá na un momento trágiko den e region”, segun e monarka, kende ta hefe di Estado pero ta realisá sierto deklarashonnan i kasi nunka ta tuma posishon, ya ku Kas Real ta bisa di ta neutral den polítika. E gobiernu spañó, presidí pa e sosialista Pedro Sanchez, a rekonosé e estado palestino den mei di 2024, huntu ku Irlanda i Noruega, i a bira un dje ehekutivonan di Union Europeo mas kritiko kontra di e promé minister israelí, Benjamin Netanyahu.
E tenshon diplomátiko a sigui krese ku anulashon dje etapa final di e buèlta di siklismo na Spaña djadumingu último, despues ku den kareda di 100.000 manifestante propalestina a stroba e kareda den e rekorido dje karera den Madrid.
Sanchez, ku ta presidí un gobièrnu di koalishon di iskierda, a deklará su “atmirashon profundo” pa e mobilisashon i a sugirí pa ekskluí Israel di kompetensianan internashonal “te ora ku e barbaridat ta tras di lomba”.
Israel no tin embahador na Spaña for di despues dje rekonosimentu di e estado palestino. Di su parti, e Ministerio di Asuntunan Eksterior spañó a yama e embahador di Tel Aviv pa konsulta dia 8 di sèptèmber, despues di kruse di deklarashonnan kada bes mas fuerte entre e dos gobièrnunan, entre nan yamada pa no bende ni kumpra arma di Israel.
