LONDON, REINO UNI, AFP.- Prens Andrew, ku ta enfrentá un huisio pa abusu seksual di un menor na Merka a kombertí den un bèrgwensa pa Reina Elizabeth II. E Reina a priva prens Andrew di tur su honornan royal pa protehá e monarkia britániko.
E desishon, anunsiá pa Buckingham Palace djaweps den un komunikado a okupá ‘front page’ di mayoria korant britániko.
E situashon a sali for di man despues ku un hues di New York a ninga di kanselá un demanda sivil ku ta akusá Andrew, di 61 aña, di agredí Virginia Giuffre seksualmente den dékada di 2000. E kaso ta vinkulá ku e finansiero defuntu Jeffrey Epstein.
Alrededor di 150 militar a skibi un karta pa reina Elizabeth poniendo énfasis riba e falta di “komportashon honorabel” di e prens.
