WILLEMSTAD.- Despues ku nan a pasa 3 luna den e parti mas ariba di Karibe e barku Freewinds ta bek na Kòrsou kaminda nan lo sigui ofresé konsiertonan grátis pa pueblo.
Djamars awor dia 11 di yüli, honor ta toka na dos kantante lokal pa hasi nan presentashon den un konsierto pa pueblo di Kòrsou. Ta trata di e kantantenan Reinir Lijfrock i tambe Jennifer Grant ku lo presentá.
Reinir Lijfrock:
Ta trata aki di un kantante ku no tin mester di introdukshon. Reinir ya ta ku atraves di añanan ku a pasa a bin ta traha su nòmber pa loke ta trata farándula aki na Kòrsou, no solamente den festivalnan di tumba, pero tambe en general.
Ta bon pa bisa ku aki un par di luna, Reinir Lijfrock lo ta den un tremendo show di R&B ku na e momentunan aki ta preparando riba Freewinds.
Den e show di djamars awor, ta e intenshon pa Reinir kuminsá duna un ñapa pa loke ta trata e show di aki algun luna. Reinir djamars awor bai kanta pa su pueblo.
Jenifer Grant:
Aki ta trata di un kantante hóben i nobo ku awor ta penetrando mas i mas den e mundu farandulero di Kòrsou.
Jennifer a kuminsá kanta for di su 4 aña, pero ku su 9 aña el a kanta pa promé biaha dilanti públiko den un festival di kanto na skol. Jenifer a partisipá tambe den Grupo di Kor, pero tambe den Curastars all talent i na 2015 el a bai lès di kanto serka Tony Worrel. Jennifer ta un kantante hóben ku un bunita bos.
The Freewinds Band i NGN Brazz
Ta bon pa menshoná, ku durante de presentashon di djamars awor, lo tin kompañamentu musikal di The Freewinds band enkabesá pa e gran músiko I guitarista Patrick Zaguray i tambe e otro músikonan talentoso di e tremendo banda aki. Tambe lo tei presente den NGN Brazz ku ta ser formá pa Norman Kooks (trompèt), Giovanni Atalita (trombon) i tambe Norbert Girigorie (sax) pa hasi e totalidat pa loke ta trata e kompañamentu musikal.
Entrada grátis
Manera a bira kustumber, entrada pa e konsiertonan ku Freewinds mes ta organisá ta grátis. E show ta kuminsá eksaktamente 8 pm i p’esei nos ta pidi tur hende pa nan tei for di 7:30 pa asina ei nan por subi i presensiá un tremendo show.
Ku tur probabilidat Freewinds djamars awor dia 11 di yüli lo ta mará na Mathey Werf ku ta keda nèt dilanti di Luna Blou. Pa bo keda registrá pa un o mas asiento den e show aki, manda un app na +5999513-0837 i bisa kuantu lugá bo tin mester. Tur esnan ku den pasado a yega di bai e shownan riba Freewinds sa kon bon e ambiente aki sa ta.
