GRAN BRETANIA (AFP).- Djaluna e promé minister britániko, Keir Starmer, a apoyá su kolega danes, Mette Frederiksen, despues di menasanan nobo di parti di Donald Trump relashoná ku Groenland. Djadumingu e promé minister danes a hasi un yamada riba Merka pa “stòp ku su menasanan kontra di un aliado históriko” despues di deklarashonnan di Trump kende a bisa ku Merka “mester” aneksá Groenland, un teritorio outónomo danes.
“Mi ta apoy’é i e tin tur rason riba futuro di Groenland”, segun Starmer a deklará refiriendo na Frederiksen. “Groenland i Reino di Dinamarka, i solamente Groenland i Reino di Dinamarka, mester disidí riba futuro di Groenland”, segun e mandatario britániko.
E intervenshon militar norteamerikano den Venezuela, pais ku ta gosa di gran interes serka Trump pa su enorme reservanan di petrolio, a trese bèk e temornan relashoná ku Groenland pa su ubikashon stratégiko i su importante rekursonan mineral ku ainda no a keda eksplorá.
“Nos tin mester di Groenland pa garantisá seguridat nashonal i Dinamarka no ta den kapasidat pa hasi esei”, segun Trump a deklará djadumingu.
