Marchanan di protesta ku a tuma lugá na Inglatera relashoná ku morto dje hóben Henry Nowak.
GRAN BRETANIA (AFP).- Gobièrnu britániko a denunsiá “esnan ku ta purba na interferí” den nan demokrasia, despues ku e vise presidente norteamerikano, JD Vance, a kondená e forma mediante kua a referí na e asesinato di un studiante blanku, Henry Nowak, na man di un hòmber ‘sij’.
“Nos a mira personanan ku a purba na mete den nos demokrasia i ta buska pa lanta un divishon den nos kayanan”, segun un komunikado dje bosero di promé minister Keir Starmer. El a insistí ku e famia di Nowak a pone bon kla ku nan no ke pa e morto di nan yu “keda usá pa krea mas divishon, odio òf tenshon”. E komunikado di Downing Street a keda publiká despues ku Vance riba X a pone un relashon entre e asesinato ku loke e ta yama dekadensia di sivilisashon kousá pa migrashon masivo.
“Henry Dowal a muri di e mesun manera ku sivilisashon ta muri: bandoná, ku mannan mará pa outoridatnan ku no a konfia i tampoko preokupá p’e, i akusá di krímennan di odio ku e no a kometé”, segun Vance riba X. “Su asesinato ta mes trágiko komo indignante”, el a agregá.
Henry Nowak, di 18 aña, a keda hinká pa Vickrum Digwa, un hòmber sij di 23 aña, na momento ku e tabata regresá di un fiesta na Southampton, na kosta zùit di Inglatera, dia 3 di desèmber último.
Nowak a keda di ‘bui’ pa polis siendo e tabata heridá. Riba un video por tend’é bisa ku bos débil: ”Mi no por hala rosea”. E kaso a keda hopi politisá na Reino Uní.
Un hues a kondená Digwa na por lo ménos 21 aña di prizòn pa asesinato dje hóben i pa a gaña polis bisando ku e studiante a insultá su persona ku palabranan rasista.
“Awe e mester ta bibu, i esei lo ta e kaso si e último generashonnan di élite europeo a mantené nan mes firme pa ku e polítika di invashon masivo di migrantenan, hopi di nan ku ta despresiá Oksidente “, segun Vance a agregá.
