WILLEMSTAD.– Un informashon ku a sali riba retnan sosial ta indiká ku e kompania di telekomunikashon Digicel lo ta ofresé e posibilidat pa rekargá bo telefòn prepago hasiendo uso di plaka alternativo ku ta Bitcoin. E informe ta hasi uso di logo di Digicel i ta indiká ku e ta konta pa Digicel Curaçao tambe. E ta indiká un lista di tarifanan na florin antiano i kon e kompania ta kalkulá esaki den bitcoin. Por ehèmpel un kliente ku ke rekargá su telefòn prepago ku 10 florin, lo por paga esaki ku bitcoin: 0.000840 BTC. Pa rekargá bo telefòn ku 30 florin lo por usa 0.002500 BTC i pa rekargá na balor di 90 florin mester usa 0.007490 BTC.
EXTRA a pidi mas informashon serka funshonarionan di Digicel i e kontesta ku nos a haña despues ku nan a hasi nan chekeo intenso ta ku ta trata di otro notisia fabriká esta ‘fake news’. Mester bisa ku e anunsio a kapta basta atenshon di hendenan ku a mustra apresio pa e echo ku e kompania Digicel ta demostrá ku nan ta habrí pa inovashon. Uso di bitcoin den e forma di pago konvenshonal no ta wòrdu usa aki ainda. Otro pregunta ku tambe ta surgi, ta kon a yega na e kalkulo pa sa kuantu kada 10 florin ta kosta.
Digicel Kòrsou ta splika ku e informashon riba ret sosial ei no ta kuadra Atol. Ni sikiera ta algu ku nan a pensa òf papia internamente te ku por tin tarifa i tur kos manera e informe ta indiká. Pues atrobe notisia falsu, asina Digicel Kòrsou a splika EXTRA.https://en.bitrefill.com/digicel-curacao/
