DEN HAAG, Hulanda (AFP).- E presidente enkargá di Venezuela, Delcy Rodriguez, ayera a bisa na Den Haag ku su pais “ta e úniko doño” di Esequibo, un teritorio ku ta den un disputa ku Guyana. “M’a keda bo kla ku e úniko pais ku tin derechi riba e teritorio aki, e teritorio den kontroversia, ta Venezuela”, segun Rodriguez a bisa na De Haag, kaminda e ta representá Venezuela den Korte Internashonal d Hustisia.
Segun e mandatario venezolano, su presensia na Den Haag tin komo meta pa “defendé derechinan históriko” riba e “Guyana Esequiba”. Riba e kanal di Telegram, Rodriguez a trese dilanti ku “e úniko doño di Guyana Esequibo ta Venezuela i semper nos lo bringa pa e derechinan legítimo i históriko riba e teritorio”.
Guyana i Venezuela tin un disputa teritorial largu ku ta datá di siglo XIX. E disputa teritorial a intensivá despues ku den 2015 ExxonMobil a deskubrí áreanan enorme di petrolio riba laman ganchu, loke a konbertí Guyana den e pais ku reservanan mundial mas grandi di krudo pa kapitá.
Guyana ta para’riba ku e linia di su frontera, ku ta datá di époka kolonial ingles, a keda ratifiká den 1899 pa un Tribunal di Arbitrahe na Paris i ke mira ku awor e ta keda konfirmá. Venezuela, di su parti, a insistí ku un akuerdo firmá den 1966 ku Reino Uní na Ginebra -promé ku independensia di Guyana- ta referí na un solushon negoshá. Pa e motibu ei, Venezuela ta para riba ku e riu Esequibo mester ta un frontera natural, manera den 1777, den e époka di kolonisashon spañó.
