Rekompensa di 5 mil florin pa informashon kandela ofisina di impuesto
WILLEMSTAD. - Polis ta hasi un yamada na komunidat di Kòrsou pa koperá ku e investigashon relashoná ku e kandela na ofisina di Impuesto na Regentesselaan i ta duna un rekompensa di 5 mil florin pa e tep di oro. Relashoná ku e kandela ku a surgi na ofisina di Impuesto na Regentesselaan den e mardugá di djaweps 22 di ougùstùs último, Polis huntu ku Ministerio Públiko ta realisando investigashon pa determiná mas pronto posibel, kousa di e kandela aki. Den kuadro di esaki, ta hasi un súplika na komunidat pa koperá ku informashon den kaso ku a nota un situashon sospechoso den e besindario ei. E entidatnan aki athunto na e komunikado aki ta suministrá imágennan pero tambe e informashonnan ku e tim investigativo ta deseá. I esakinan ta: - Si tin siudadano ku konosé e vehíkulo aki; - Si konosé e outo aki i por asosi’é ku dos òf tres persona maskulino; - Si tin hende ku por a mira e vehíkulo òf e hòmbernan aki promé òf despues di e kandela na e ofisina di servisio di impuesto. Ministerio Públiko ta duna un rekompensa di 5 mil florin na e informashon ku por kondusí na solushon di e kaso aki. Pa duna tep riba e kaso aki, por yama e number anónimo di polis 108. Kuerpo Polisial i Ministerio Públiko ta konta riba yudansa di komunidat pa por solushoná e kaso aki tambe.