Mañan ta duna inisio na un siman di konsientisashon di prevenshon. E siman ta kulminá ku dia di bombero djasabra dia 9 di òktober. E aña aki e tema ta ‘rekonosé bo zonido di prevenshon’. Luzmarie Ster i Dikmar Oleana di e departamentu di prevenshon a konta kiko por spera di brantwer e siman aki en partikular.

Tin algun aña kaba ku brantwer ta partisipá pasobra ta algu ku mundialmente ta tuma lugá entre otro na Merka tambe ku tin e siman di prevenshon di kandela, meskos ku na Hulanda. Rònt mundu brantwer ta para ketu na e prevenshon di kandela. E ta importante pasobra hopi bia konosé e parti di pagamentu di kandela ku ta mas bien e fase kaminda tin kas na kandela, edifisio òf outo na kandela pero tambe tin e parti di prevenshon, kiko e hende mes por hasi pa evitá ku e ta hañ’é den un situashon di kandela. Durante di luna di òktober, tin un siman kaminda rònt mundu ta para ketu riba e importansia pa konsientisá komunidat riba prevenshon di kandela.


Prevenshon

Kiko ta prevenshon di kandela. Un parti di dje sigur ta siña e mucha for di chikí pa no hunga ku kandela. Luzmarie Ster a konta ku tin un tòp 10 di rísikonan di kandela i den esei ta entre otro siña bo yu pa no atendé ku kandela. Esaki hopi bia por mir’é komo algu inosente ku e mucha ta hunga ku lusafè pero e simpel lusafè por kai riba un kolchon òf sofa i e por ekspandé bira kandela grandi i ku e chèns di pèrdè parti di kas durante di e kandela.

Rísikonan pa kandela

Dikmar Oleana a papia di e tòp 10 di rísiko. El a bisa ku mester para ketu na kas. Hopi bia ta konsentrá den prevenshon di kandela na kas prinsipalmente e último añanan aki pasobra por mira e sifranan ta subiendo. Si wak for di 2019 tabatin 41 kas tota ku tabatin kandela sea parti òf parsial. Na 2020 el a bisa 55 kas i awor na 2021 ya tin 36. Por mira un subida i práktikamente por bisa ku ta kada siman tin un kas ku ta kima. Esei ta alarmante i p’esei brantwer ke enfatisá riba e prevenshon di kas na kandela i den e kaso aki para na e importansia di un detektor di huma den kas ku por evitá ku tin kandela i konosé e zonido tambe di prevenshon.

Pa loke ta e tòp nan di rísiko;

Bela; por mira ku te ainda hende ta bai laga kas ku bela sendé. E ta sumamente peligroso. Kisas ta lag’é banda di kortina, bentana un tiki habrí, bientu ta supla i e ta bula pega na kandela. Un kandela asina ta ekspandé masha lihé mes.

Eléktriko; pa loke ta e parti aki, ta referí na e surge protektor ku den práktika por mira tin di kalidat inferior i hende ta sobr’é karga esaki. Ta pone diferente kos riba e solo surge protektor ei i e no por karga e kapasidat ei. Esei poko poko ta forma un korto sirkuito ku posibilidat na kandela.

Kandela den kushina; Hopi bia brantwer ta haña nan konfrontá ku kandelanan ku ta kuminsá den kushina. Kisas kushinando e hende ta kue telefòn òf bai sosegá un ratu tanten e kuminda ta kushiná i ta pega soño i laga stof sendé i e kandela den wea ku tambe ta rísiko.

Eskape di gas; esaki por forma un eksploshon. Te ainda tin hende ku bòternan di gas chikí poné den kas. Ora tin eskape di gas bo no ta sinti e holó fásil. I ta yega djis sende lus so i e ta forma un eksploshon. Brantwer a yega di topa ku e hende ta lanta mainta na un kas kaminda tabatin eskape di gas sin e sa i e ta sende lus i forma eksploshon. E kosnan aki ta importante pa tene kuenta kuné pa evitá ku ta yega na kandela.

Kashi koriente; Un otro situashon ta ku hende ta pone muchu kos ku ta ranka for di un kashi koriente ku no ta apropiá. Tin bia hende ta traha e kas un manera i a sigui ampli’é sin tene kuenta ku e kapasidat di koriente ku e kas mester tin. Tambe tin hende ta hasié pa mas fásil pa hende barata pasa instalashon prinsipalmente den ampliashon. Ora traha e kas, e kashi koriente tin di kùr pero ora sigui amplia i pone mas kos riba e kashi, e por pasa su kapasidat. Ta bon den e kaso ei laga hende ku konosementu revisá ki ta e kambionan ku tin di hasi pa evitá ku kada bes koriente ta kai afó òf kort sluiting ku por ta peligroso.

Detektor di huma

I un detektor di huma sigur por a evitá huma. Un detektor di huma hopi bia promé ku bo mes por sinti e holó òf mira e huma, ya kaba e si a detekt’é i e ta kuminsá pita. Por tende un zonido tres bia i e ta keda ripití konstante. Esei ta indiká ku tin un kandela un kaminda. E señal ei ta pa alertá i akshoná pa wak kiko por hasi. E promé kos ta yama brantwer i despues purba hasi algu.  Si bo tin un blusser chikí na kas por us’é. Si e kandela a bira grandi ta mihó sali safe pafó. Tur hende di e kas mester sali pafó pa ta na lugá safe i warda brantwer yega pa akshoná.

 

Prevenshon e mihó opshon

Pa loke ta e parti di konsientisashon, Brantwer Kòrsou ta usa su página di Facebook i Instagram nan ta duna tepnan mas visibel. Hopi hende ta hasi vários pregunta i no sa presis kiko tin di sosodé i p’esei atraves di un kampaña ‘rekonosé bo zonido di prevenshon’ ta purba ta na entre otro medionan di komunikashon, pa duna informashon pa hende sa kiko ta e tepnan ku e tin di tene kuenta kuné. I semper por yama brantwer pa hasi preguntanan pa sa kiko tene kuenta kuné. Tambe lo bai tin charlanan di konsientisashon. Nan a kuminsá kaba pero debí na COVID a posponé hopi charla kaminda tin e kampaña di Prevenshon ta e mihó opshon. E charlanan a inkluí barionan, kasnan di grandi i tambe Brantwer a haña diferente petishon i p’esei den e luna aki nan lo bai duna e charla di prevenshon kaminda por mira kontenido kiko ta pasa den un kas, ki ora e kosnan ta kuminsá, kon nan ta kuminsá i e konsekuensianan.

 

Plan di eskape

Brantwer ta konsientisá famianan pa tin un plan di eskape. Kiko e hende mes por hasi na su kas. Abo ku famia ta sinta huntu i traha e plan di eskape pa si algu pasa unda ta bai, kiko ta e kosnan ku lo hasi, ken lo mester yama brantwer pa duna notifikashon di kandela, kiko ta pasa ora di kandela, dokumentunan importante ta bon warda nan ta otro kaminda ku si kas kima e bida por sigui despues. Tambe Brantwer tin un lista di kontròl pa huntu ku famia sinta i wak si tur kos ta na lugá i sigur. Pa mira alabes kiko falta pa drecha pa e parti di seguridat na e kas. Esaki lo purba konsientisá hende pa den seno familiar purba wak kiko ta e kosnan ku por hasi pa asina evitá ku ta haña un situashon di kandela. Tin blusser chikí ku por tin na kas. No mester ta esun grandi pa negoshinan, pero un chikí ta bon pa un kas. Si ta un kandela chikí e hende mes por aktua i evitá ku e kandela ta ekspandé.


Hopi kas no ta kumpli

Pa loke ta e blusser ku un hende por tin na kas, Luzmarie Ster a splika ku nan ta konsehá pa tin un blusser di puiru. Esei pasobra mayoria di kas, mayoria material den kas, por paga ku un blusser di puiru. Kosnan eléktriko so mester di otro blusser. I ku tur loke brantwer a informá, tin vários kas ku nan tin di atendé na kandela, sea parti òf kompleto i tambe edifisio. I ora nan puntra e hendenan ku si nan a yega di mira e bòternan kòrá, ku ta e brandblusser, nan a yega di mir’é pero no sa kon hasi uso di dje. Tampoko mayoria no tin detektor di huma i no sa mes di e kos ei. I brantwer ta splika ku un detektor di huma awendia a bira asina barata i a bira algu asina fásil aksesibel. Un detektor den kambernan, den gang, den sala i si algu pasa e kos aki ta alertá mesora. Ta importante pa splika hende ku ora e ta na soño e no ta hole nada. Bo nanishi ta drumi pero bo orea si ta keda lantá. I p’esei un detektor di huma ta pita pa duna e atvertensia aki si e hende ta drumí. Ta importante pa komunidat kuminsá bai den e direkshon kaminda hende ta konsientisá nan mes kiko ta e peligernan di kandela i kon nan mes por fasilitá nan bida i di nan famia kompleto pa ta muchu mas sigur. No lubidá ku den 3 pa 4 minüt un kandela chikí por ekspandé i e hende mes na kas no por hasi nada mas. I p’esei mas tempran posibel keda alerta i pa alerta brantwer pa yega mas lihé posibel pa evitá ku e daño ta bira muchu mas grandi.

 

Siman di prevenshon

Mañan ta kuminsá e siman di prevenshon. Durante di e siman aki lo tin diferente entrevista. Lo duna hopi informashon. Riba FB di brantwer i tambe nan wèpsait por tuma nota di tepnan ku ta keda sali. Lo tin un rifa pa gana detektor di huma via FB i wèpsait kaminda ta kontesta pregunta i gana. I ta importante pa tuma nota di tepnan. Hopi bia brantwer ta duna informashon pero hende mester ta habrí pa tuma e informashonnan aki. Lo tin algun aktividat ku lo promové kaminda durante di luna di òktober kompleto nan lo tei pa hende partisipá i risibí informashon di prevenshon di kandela. Ta intenshon pa e tipo di informashonnan aki kontinuá henter aña. Nan lo hasi tur aña ku un tema diferente. E bia aki ta rekonosé e zonido di prevenshon di kandela pa asina keda hasi e hendenan konsiente. Lo mira den e diferente sekshonnan di informashon ku hende no tabata sa òf no tabata mira e importansia. Pero ku e informashonnan di brantwer ta yega na e konsientisashon ku mester yega na dje. Ku e kampañanan ta purba keda motivá pueblo di e importansia i akshoná. Por siña asta kon ta usa un blusser den e kampaña aki. Dikmar a pone énfasis riba téknikanan ku ta konsientisá hende riba dje manera tene kuenta ku ora bo ta paga un kandela semper ora ta bandoná e kandela, hasi ku kada pa e kandela i no ku lomba. Otro tep ta ku sòru pa semper tin un tapa di wea djis banda di kaminda bo ta kushiná pasobra si kandela surgi den e wea, ta djis paga e stof i tapa e wea i asina e kandela ta paga. Ta dor di duna hende konosementu, por evitá hopi kandela.

 

Dia di bombero

E trabou di bombero mester keda hasí di kurason, e ta un yamada pasobra ora tur hende ta kore bai di e kandela, abo komo bombero ta kore bai den e kandela. P’esei mester hasié di forma sigur, pa wak propio seguridat. Dia 9 di òktober ta dia di bombero. Pa e dia ei nan lo para ketu na e bombero i duna nan e atenshon nesesario ounke mester tene kuenta ku nos ta den un pandemia ainda i e ta limitá brantwer di hasi algu grandi ku aglomerashon. Nan lo sòru pa durante di e periodo aki, den e kuadro finansiero ku por wak pa duna maske ta e atenshon na e bombero pasobra nan ta hasiendo un trabou balioso.

LAGA UN KOMENTARIO

Please enter your comment!
Please enter your name here