WILLEMSTAD – Un kantidat rèkert di 80 persona a partisipá na ‘The Curaçao Murph Challenge’ djasabra último na ‘5 triple 9 Fitness’ (home of CrossFit 5 triple 9). E aña aki pa promé biaha e evento tabata habrí pa un i tur. Tabatin vários partisipante di e vários kuerponan ku tambe a partisipá na e famoso ‘The Curaçao Murph Challenge’, ku a bira un fenómeno global. Ademas tabatin un ambiente amikal ku partisipashon di vários atleta di otro gymnan di Crossfit i tambe gymnan tradishonal. Sin duda un bunita gesto pa apresiá kon e komunidat di Crossfit di Kòrsou a uni forsa i pa duna onor na forsanan arma, Kuerpo Polisial, Wardakosta, VKC, bomberonan i tur esnan ku ta promé pa respondé na kualke kalamidat. E motor tras di e evento aki, Ivan de Windt Jr. tabata sumamente orguyoso ku e resultado di e aktividat aki djasabra último. “Mi deseo ta pa den futuro e ‘Curaçao Murph Challenge’ aki sigui krese i por sigui rekonosé e kuerponan speshal aki.”
E kompetensia tabata pa un i tur partisipá sea komo individual òf komo ekipo. Tabata eksistí e posibilidat tambe pa hasi e reto aki den ekipo di 2 persona den un vershon mas suavisá. ‘The Curaçao Murph Challenge’ tabata konsistí di kore 1600 meter, 100 ‘pullup’, 200 ‘pushup’ 300 squat i kaba ku kore 1600 meter atrobe. E vershon mas suavisá (scaled) tabata kore 800 meter, 100 ‘ringrows’, 150 ‘pushup’, 200 squat i bolbe kore 800 meter.
