Rekonstrukshon di santana hudiu na Barranquilla

688

Na Barranquilla ta re-konstruyendo un santana kaminda tin hudiunan di Kòrsou derá ku a bai e siudat ei pa establesé nan negoshi.  Den e santana Sefardi tin un historia di e promé hudiunan ku  a yega Barranquilla den e último dékadanan di siglo XIX i nan tabata pilarnan fundamental pa e desaroyo ekonómiko, sosial i kultural. Desendientenan di e hudiunan a restourá e santana i ta pone den lus komo un patrimonio kultural i históriko di pais. Djasabra a kombersá ku Luz Marina Forero kende a studia e tema aki i a kolaborá ku e desendientenan venezolano i kolombiano pa nan haña nashonalidat spañó i portugues.

 

Hudiunan di Kòrsou na Colombia

Luz Marina a konta nos ku aki el a kolaborá ku e kongregashon hudiu pa haña e registronan antiguo sinagoga  pa venezolano, merikano, panameñonan por haña e nashonalidat spañó òf portugues debí ku nan ta desendientenan hudiu. E trabou ei a hib’é na investigá su raisnan hudiu pasobra su famia ta di orígen hudiu di fam Senior. Ta trata di dos ruman ku a yega Kòrsou alrededor di añanan 1650 pa 1659 i a biba aki te na momentu ku nan a emigrá pa vários pais manera Venezuela i Colombia. Den e  investigashon ei Luz Marina a bin konosé diferente desendiente di hudiunan ku ta biba na Colombia manera De Sola, Salsedo, Henrquez, Osorio, Senior i nan a kuminsá traha riba e santana Sefardi na Barranquilla. Ta trata di un tereno ku famia Senior a duna na e kongregashon di sinagoga i for di e tempu ei e hudiunan tabata keda derá riba e tereno santu ei i awor e desendientenan a disidí na drech’é. Nan a drecha dak, nan a fèrf etc..

 

Un historia no masha konosí

No ta trata di un historia asina konosí i prinsipalmente no ku hudiunan for di Kòrsou a bai Colombia. Luz Marina a konta nos ku tin un buki masha interesante di Josette Capriles ku yama ‘The Girls they left Behind’ i e ta trata e historia di hudiunan di Kòrsou ku a emigrá pa kontinente Amérika manera Colombia i Venezuela pasobra den aña 1816 tabatin un epidemia di ‘viruela’ riba e isla i e situashon ekuméniko no tabata asina bon. I e yunan hòmber a emigrá i a bai Colombia. Ora nan a yega Colombia nan a keda masha bon risibí. Nan por a papia 4 idioma konosé komersio ekselente i tin konekshon ku Oropa i ta masha honesto den nan tratonan komersial. Eseinan a yama e atenshon di e abitantenan na kosta kolombiano. Nan a bai siudatnan manera Barranquilla i Cartagena. Nan a bai ku sèn i nan a lanta banko, nan a establesé e promé klup sosial di Barranquilla, nan a konstruí e promé ‘acueducto’ di Barranquilla. Nan a kasa ku kolombianonan apesar ku nan a mantené nan religion.

 

Desendientenan

I te ainda tin masha hopi desendiente na Barranquilla. Tin masha hopi di nan i hopi hendenan masha importante i ku kontribuí na desaroyo di Kolombiano. Por ehèmpel un di e promé gobernadónan di Barranquilla ta di fam Pereira di Kòrsou, otro de Castro di Kòrsou. E di dos kompania di aviashon mas grandi na mundu Scadta ku despues a bira Avianca, a keda kreá pa hudiunan na Barranquilla ku tambe a bin di Kòrsou. Originalmente e hudiunan di Kòrsou tabata biaha den barkunan i a yega e Guajira kolombiano kaminda nan tabata hasi hopi negoshi ku e indigenanan manera ku Divi Divi, kueru di bestia, kabritu i hopi mas i eseinan nan tabata eksportá pa Oropa i otronan tabata trese otro kosnan ku tabata bende. Konsekuentemente nan tabata drenta via Guajira kaminda hopi a keda pero tin a pasa pa Sta Marta, sigui pa un siudat entre Sta Marta i Barranquilla ku yama Sienaga kaminda tin hopi desendiente di famia Alvarez Coreia i Henriquez i otronan a sigui pa Barranquilla, Bucaramanga pero masha poko a sigui bai mas paden den e pais pero a keda mas na kosta.

 

Sukursal di Banko Maduro na Colombia

Luz Marina a konta mas aleu ku tin diferente estudio i emigrashon di hudiunan di Kòrsou pa kosta esaki na promé lugá pasobra nan a laga atras un legado masha importante manera banko di e pais, konstrukshon di e ‘Acueducto’ (konstruí danki na Jacobo Cortizzos i Ramon Jimeno) i hopi mas. Loke a yega Luz Marina ku emoshon ta ku Banko Maduro di Kòrsou tabatin un sukursal grandi na Barranquilla. Esaki pasobra nan a hasi un fiansa na e siudat, pa nan por a konstruí un trein ku tabata kore for  di Barranquilla pa asina por a eksportá produktonan produsí einan.

 

Legado

Tur e estudio ku Luz Marina a hasi e ke pone den un buki. El a bisa Djasabra ku e ta pensando riba e posibilidat di ku e desendientenan di Kòrsou ku a biba na Kosta por konosé nan historia, pasobra nan no konosé. E ta kòrda un amiga di dje ku e mester a bis’é ku e  ta famia di desendientenan hudiu masha importante ku a lanta e di dos kompania di aviashon mas grandi na mundu e tempu ei. E amiga  nunka a tende di esaki. Esei a laga Luz Marina ku e inkietut di por yega na un buki kaminda e desendientenan por konosé di unda nan a bin i pa nan sa unda nan ta bai i pa Kòrsou tambe sa di e legado ku nos hendenan di aki ku a laga na Colombia.

Traha hopi sèn

Mester enfatisá ku e hudiunan di Kòrsou ku a bai Barranquilla a bai ku sèn pero nan a traha hopi sèn mas na e siudat kolombiano. Nan a traha esaki honestamente, nan a trese hopi idea di futuro, nan tabatin hopi konosementu empresarial. Por ehèmpel un famia de Lima di Kòrsou ku a bai i ku tabata entre otro gobernadó. Pero e hudiunan ku a bai Colombia tambe a dediká nan mes na agrikultura. Nan a kultivá  katuna, tabako, suku i banana. I tur loke nan tabata kultivá tabata keda eksportá pa Oropa. I an a trese atministradónan aleman i asina tabata hiba nan kultivonan dilanti.

 

Firma pa fin di guera

Otro parti di historia masha importante ku Luz Marina a menshoná den nos kombersashon ta ku Colombia semper tabata un pais di guera interno. Un di nan tabata e guera di mil dia ku a kuminsá na 1897 i a kaba na 1903. E promé firma di ku no tin mas guera a keda hasí den e finka di Luz Marina su ‘tatarabuelo’ ku tabata yama Nerlandia. Einan a yega tur polítiko i nan a firma einan pa terminá e guera.

 

Mas impuesto

Luz Marina a bisa ku for di e tempu ei loke a dominá serka e personanan ku tabata yega di Kòrsou pa Colombia tabata e dominio di kuater idioma, ulandes, ingles, papiamentu, spañó i asta portugues. Esei a habri kaminda pa nan i e hendenan por a komprondé nan. Nan tabata hendenan kulto i honesto den nan transakshonnan ekonómiko. 25 persona den aña 1870 ku mas tabata paga impuesto, 7 di nan tabata hudiunan di Kòrsou.

 

Derá i inskribí na Kòrsou

Na kosta di Colombia no tabatin santana hudiu i p’esei nan tabata lora e kadavernan i ta trese nan Kòrsou pa dera aki den Beit Haim. Ei tin hopi hende/ hudiu di Colombia derá einan. Tabatin un rabino di fam Ricardo i e tabata biaha entre Colombia, Venezuela, República Dominicana.  E tabata kasa e hudiunan i tabata inskribí nan den buki aki na Kòrsou. I ta p’esei a krea e promé santana na Barranquilla pa hudiunan.

LAGA UN KOMENTARIO

Please enter your comment!
Please enter your name here