na Sandals Royal Curaçao; pa restourá refnan di Kòrsou
WILLEMSTAD.- BRANCH Coral Foundation, den kolaborashon ku Sandals Foundation i Sandals Royal Curaçao, a organisá nan rekoudashon di fondo anual, pa sostené e refnan di koral di e isla. E evento a reuní partnernan di konservashon, lidernan gubernamental i miembronan di komunidat pa un nochi inspiradó dediká na restourashon di ref.
Fundá pa biólogo marino Max van Aalst, BRANCH Coral Foundation ta traha aktivamente riba restourashon di refnan di Kòrsou for di tres aña kaba, bou di nan lema: “Grow. Reefs. Together.” Ku ocho lokashon di ‘nursery’ di koral na Korsou, BRANCH ta krea aproksimadamente 7.000 koral pa aña, sostené pa mas ku 150 boluntario i hopi partner lokal.
Ademas di restourashon di koral, e fundashon ta pone un énfasis fuerte riba edukashon i partisipashon di komunidat, esfuersonan ku ta bira mas i mas visibel den e ekosistema marino di Kòrsou.
Un aña pasá, BRANCH Coral Foundation i Sandals Foundation a forma un relashon enfoká riba konservashon di ref ku akshon práktiko. Huntu nan a establesé un ‘nursery’ di koral serka Sandals Royal Curaçao ku ta krea 800 koral ‘staghorn’ na peliger di ekstinshon pa aña. E kolaborashon no ta keda solamente na ‘nursery’ di koral: Sandals ta promové konsientisashon di sostenibilidat entre nan huéspet i regularmente ta partisipá den sambuyamentu pa mantenementu i monitoreo di koral huntu ku BRANCH.
Resientemente, tim di ‘watersports’ di Sandals a keda sertifiká pa PADI BRANCH Coral Restoration Dive, permitiendo nan eduká buseadónan lokal i huéspetnan tokante ekosistema di ref di koral i esfuersonan di restourashon.
E rekoudashon di fondo a yama bon bini na mas ku 200 bishitante, tur mustrando sosten fuerte pa preservashon di e herensia marino di Kòrsou. Invitadonan a selebrá e mishon kompartí miéntras nan a disfrutá di músika bibu di e bandanan lokal Manique i Serendipity, brindando pa huntu ku hopi partner di BRANCH. Entre esakinan tabata Sandals, Jan Thiel, Scuba Do, Fundiving Curaçao, Dive Center Pietermaai, Sunscape, Il Mare, Dreams, Kokomo i Porto Mari — partnernan tantu di hopi tempu tempu komo esnan nobo, tur uni pa un meta komun.
E anochi a keda onrá ku presensia di Promé Minister Gilmar “Pik” Pisas i Minister Tyron Boekhoudt di Ministerio di Salú, Medio Ambiente i Naturalesa.
Durante e evento, Jeffrey Speelman, General Manager di Sandals Royal Curaçao, a anunsiá plannan pa dòbel kapasidat di e ‘nursery’ di koral di e resort i pa ampliá sosten na mas espesie di koral, un paso importante den restourashon lokal di ref.
Danki na donashonnan generoso di spònser via un lotería i subasta silensioso, e evento a logra rekoudá mas ku XCG 20.000, ku ta bai direktamente pa sostené e trabou kontinuo di BRANCH Coral Foundation.
BRANCH Coral Foundation ta invitá tur hende na Kòrsou ku tin pashon pa konservashon di naturalesa pa uni ku nan esfuersonan. Por tuma kontakto via www.branchcoralfoundation.com.
Portrètnan di Wave 7 Creatives
