Dia 10 di Mart profesor Wouter Veenendal lo hasi su orashon
WILLEMSTAD.- Relashon den nos Reino ta desigual. Esaki segun profesor ekstraordinario Relashonnan di Reino (‘Koninkrijksrelaties’) Wouter Veenendaal ta bisa. “E paisnan outónomo karibense i islanan BES no tin hopi bos (‘inspraak’) i ta enfrentá problema gubernamental.” Veenendaal lo hasi su orashon akadémiko dia 10 di Mart na Universidat di Leiden na Hulanda tokante e tópiko.
Den su orashon, e ta boga pa mas igualdat i un representashon mihó. E skala chikí di e islanan Karibense, kombiná ku e modelo di gobernashon Hulandes ku no ta ahustá bon, ta krea sierto faltanan den demokrasia. Esaki ta e mensahe den su orashon. Riba wèpsait di Universidat Leiden ta duna atenshon na e orashon akadémiko. (https://www.universiteitleiden.nl/nieuws/2024/03/versterk-de-positie-van-de-caribische-delen-van-het-koninkrijk)
Manera ta konosí Veenendaal a duna un charla dia 23 di òktober di aña pasá na Universidat di Kòrsou Dr. Moises da Costa Gomez (UoC). Tema di e charla tabata ‘Demokrasia den Reino di Hulanda’. Durante su charla Veenendaal a enfoká riba demokrasia den Reino di Hulanda. El a bisa entre otro: “Ta eksistí un Konseho di Minister di Reino, pero no ta eksistí un Parlamento di Reino. Ku ta un défisit.” Veenendaal den e charla a papia tokante e posibilidat pa krea tres asiento èkstra den parlamento hulandes pa paisnan Karibense di Reino Hulandes. Te ainda e paisnan no ta representá, ku ta un ‘défisit demokrátiko’, segun Veenendaal.
Pa wak e orashon akadémiko, dia 10 di Mart 11.15 or: https://www.universiteitleiden.nl/wetenschappers/livestream-oratie-of-afscheidscollege
