WILLEMSTAD –  Nos tur sa ku e dinámiko bailarin i rapper Remses ‘MuisjeMuis’ Rafaela no por sinta ketu, ni durante e pandemia di COVID-19. Ku e produkshon teatral ‘Wijzer’, Remses a skibi un karta di amor na su dos yunan i na tur mucha ku mester nabega e ‘normal nobo’.  Riba un manera kreativo Remses ta konta e historia di e aventuranan di dos ruman homber ku mester bai drumi pero nan no por pega soño. Nan ta disidí di usa nan fantasia después ku nan iPad kibra i resultado ta un eksploshon di kreatividat i fantasia.


‘Wijzer’

Semper Remses tabatin un soño pa krea un obra teatral pa mucha ya ku e mes ta tata di dos yu di shete i tres aña. “Ta hopi importante pa nos muchanan rekonosé nan mes den un obra teatral, ya ku e manera europeo pa hasi teatro ta poko distinto”, Remses ta splika. E resultado final ta un kolaborashon ku bailarin Patrick Karijowidjojo, unda ta meskla ritmonan Afro Karibense ku Hip Hop, inyektá poko Capoeira i akrobasia aden i kombiná ku wega di sombra. Huntu ku e talentoso multi instrumentalista Stanley Clementina, Remses a kompone  e músika pa ‘Wijzer’, unda zonido di anochi a keda utilisá manera kriki. Tur e shownan tabata bendi, apesar di e reglanan di distansia sosial ku a poné ku 30 persona so por a presensia e produkshon. E resensianan di  ‘Wijzer’, tambe ta impreshonante, unda Theaterkrant i Dance Magazine a papia yen elogio di e produkshon.

Pa esnan interesá na Hulanda, e presentashon di ‘Wijzer’ día 29 di novèmber ya ta bendí, pero ainda tin algun karchi disponibel pa e presentashonnan día 2, 5, i 6 di desèmber benidero. Te desèmber, ‘Wijzer’ lo ‘tour’ rònt Hulanda, i tin fecha mas ku a bin aserka na Teatro Maas. Por chèk e página wep www.maastd.nl pas mas informashon.

Kos grandi na kaminda

Remses ta wak bek riba un 2019 eksitoso, unda por a mira Remses den e presentashon di B-Boy na Teatro Maas, komo su bailarin prinsipal. Riba tereno musikal tampoko e no a drumi, unda ela pega ‘Fangu nan’ ku rèper DANDO durante temporada di karnaval pa despues debutá ‘Mi Love’  riba e wèpsait merikano urbano popular Worldstar. Poko poko pero sigur Remses ta lagando su marka den e mundu artístiko hulandes i su aporte i dedikashon ta keda rekonosé. P’esei pa e próksimo sinku aña, por mira Remses den un eksposishon representando Kòrsou na ‘Wereldmuseum’, situá na Rotterdam. Pa 2021 por spera mas bon músika di MuisjeMuis ku algun kolaborashon hopi interesante.

 

‘Wijzer’ na ABC

Remses ta primintí ku e lo hasi tur den su alkanse pa trese ‘Wijzer’ pa nos islanan den 2021. “Awendia muchanan ta hunga hopi riba nan iPad i nan no ta mira otro mas físikamente’, Remses a splika. Ora teatro Maas a puntr’e pa traha un obra pa ‘kleuter’ e tabata sa eksaktamente ki temanan e lo a kubri. ‘Mi kier a eksplorá kon muchanan ta eksplorá i laga nan sinti traha”, e la konkluí. Mi ke siña mi yunan kon importante ta pa usa nan imaginashon i hunga ku loke tin i e obra ta un homenahe na wega físiko i fantasia di mucha”. Remses ta habrí pa traha ku e partnernan korekto pa deleitá nos muchanan ku músika i baile. Por tuma kontakto ku Remses Rafaela via e-mail na [email protected] pa mas informashon i por siguié riba Facebook.com/Remses Rafaela of /Muisjemuis i Instagram @muisjemuis.  

LAGA UN KOMENTARIO

Please enter your comment!
Please enter your name here