Despues di añanan di preparashon
WILLEMSTAD.- Trabou di preparashon pa renovashon di e edifisio monumento di Hof van Justitie/Korte di hustisia na Punda ta kanando. E arkitektonan, Anko van der Woude i Lyongo Juliana, ta konta tokante e diseño den un video grabá na e sitio (mas o ménos 4 minüt). Nan ta papia tokante e restourashon, e intervenshonnan ku lo hasi i e nifikashon di Hof pa Willemstad i Kòrsou.
E renovashon a keda diseñá pa IMD (ir. Anko van der Woude) i lyongo architecture (ir. Lyongo Juliana), riba enkargo di e ministerionan di tráfiko, transporte i urbanisashon (VVRP), Finansa i Hustisia. E diseño ta kombiná rèspèt pa e karakter monumental di e Stadshuis antiguo, ku un vishon orientá riba futuro, unda ta transformá e edifisio den un lugá di trabou moderno, sigur i duradero pa e poder hudisial.
Herensia ku ta konta historia
E Hof van Justitie ta datá di e periodo 1860–1865 i tabata e promé edifisio grandi for di e murayanan di Punda. Pa motibu di mantenshon atrasá, e edifisio monumental tabatin mester di un renovashon grandi. Arkitekto Anko van der Woude ta splika tokante e trabounan ku ta realisá. “E fachada eksterno lo wòrdu pone kompletamente riba ‘steigers’ te na e kanal, pasobra e ta keda renová i restourá por kompleto,” el a bisa den e video. Den e proseso ei no ta trata solamente di restourashon, sino tambe di kon e edifisio ta funshoná den siudat.
Arkitekto Lyongo Juliana tambe ta enfatisá e importansia di konservashon di e monumento. “Nos edifisionan i monumentonan ta konta ken nos ta. No solamente pa medio di nan diseño, sino tambe pa tur loke a sosodé aki,” el a bisa. “Dor di mantené e herensia aki, nos por sigui pasa e historia di nos pais.”
Restourashon ku rèspèt pa e kapanan di historia
E renovashon ta enfoká riba e restourashon di e balor monumental di e edifisio, ku atenshon spesial pa e diferente tempunan ku e fasenan di restourashon a pasa aden. Lo renová e fachada kompleto i kaminda ta nesesario, hasi reparashonnan. Elementonan karakterístiko manera e fachada di koló ‘oker’ i e piedra di koral visibel den e base lo keda preservá. “Bo por skohe pa trese tur kos bèk na e situashon di mas o ménos un siglo i mei pasá,” Van der Woude ta bisa. “Pero nos tambe ta mustra loke generashonnan anterior a agregá. E piedra di koral visibel ei tin un funshon i ta duna e edifisio su karakter.”
Ademas, lo adaptá e edifisio na e eksigensianan di awe, entre otro riba tereno di maneho di klima i seguridat. Na mes momentu, e aparensia habrí i akohedor, entre otro pasobra e bentananan lo keda visiblemente habrí. Despues di añanan di preparashon, e renovashon ya a kuminsá. “Nos ta masha kontentu ku nos a yega na e fase aki, unda e diseño awor ta bira realidat,” Juliana a bisa. “Pa loke ta e kolaborashon: ta masha spesial ku dos arkitekto ta traha huntu riba un solo proyekto. Nos ta traha kaba dos aña huntu na un manera agradabel; tin rèspèt mutuo i un sentido di krea kos huntu, kaminda e ekspertisio di kada un ta apresiá. Nos tin mes meta: ku e renovashon aki, hasi un kontribushon signifikativo na e siudat. For di trinta aña ta enfatisá ku mester revitalisá Punda, i mi ta konvensí ku esaki ta un paso hopi importante den e proseso ei.”
E entrevistanan ku e arkitektonan ta parti di un serie di kombersashonnan na sitio, kaminda ta splika mas detayá e diseño i e progreso di e renovashon. Kada entrevista ta pone lus riba un otro aspekto di e proyekto i ta mustra kon herensia, arkitektura i desaroyo urbano ta bin huntu. Den e aña ku ta bini lo publiká diferente entrevistanan.
Tur informashon tokante e renovashon di e Hof van Justitie por haña na www.renovatiehofvanjustitie.com. E wèpsait ta disponibel aktualmente na Hulandes i lo wòrdu ampliá den e siman ku ta bini ku un vershon na Papiamentu. Ademas, por sigui e proyekto via LinkedIn i Facebook (Renovatie Hof van Justitie), kaminda ta kompartí a fondo aktualisashonnan, entrevistanan i historia.
