SANTO DOMINGO(AFP).- Outoridatnan dominikano ta den estado di alerta pa e krísis polítiko serka su bisiña Haiti, kaminda protestanan fuerte ta eksigí salida dje promé minister Ariel Henry. Medionan dominikano a divulgá imágennan dje situashon na frontera.

“Frontera ta sigurá i ta importante pa aktivá un poko mas e servisionan di seguridat komo prevenshon pa kualke situashon ku por presentá”, segun e koronel Jan Adames, kordinadó di inteligensia na frontera dje unidat militar responsabel den e área.

“Nos ta den alerta pero no tin situashonnan di riesgo pa seguridat dominikano”, segun el a señalá.

E tránsito na frontera ta keda habrí, ounke ku migrashon for di Haiti ta será for di sèptèmber último.

Haiti, e nashon mas pober di kontinente amerikano, ya tin hopi aña den krísis, ku bandanan armá kada bes mas poderoso ku ta realisá violensia brutal i ku tin ekonomia i e sistema di salú públiko mal batí.

Den e último dianan tabatin protestanan fuerte eksigiendo retiro dje promé minister Henry, ku a asumí mando despues dje asesinato di presidente Jovenel Moise den 2021.

E presidente dominikano, Luis Abinader, a bisa ku su gobièrnu “ta siguiendo e situashon na Haiti. “Nos ta prepará pa kualke situashon ku por sali for di man, ku no ta algu nobo den e pais”.

Ademas di restrikshonnan pa migrashon haitiano, Abinader tambe a hasi su polítika pa ku e pais mas duru ku konstrukshon di un muraya na e frontera entre e dos paisnan.

LAGA UN KOMENTARIO

Please enter your comment!
Please enter your name here