…Gobièrnu dominikano ta sigui hasi esfuerso pa minimalisá e krusada di frontera for di Haiti pa nan pais. E esfera di kriminalidat na Haiti ta krea situashon difísil na e pais bisiña…
SANTO DOMINGO (AFP).- Rep. Dominicana ayera a anunsiá medidanan di vigilansia “mas estrikto” i oumento di operashon polisial na e frontera ku Haiti pa purba na frena migrashon ilegal for di e pais akí, asotá pa violensia di gèngnan.
E presidente dominikano, Luis Abinader, a hasi mas severo su polítika migratorio pa loke ta trata Haiti, despues di yega na poder den 2020, ku konstrukshon di un muraya di frontera pa mas di 170 km i deportashon masivo ku den 2024 a alkansá 276.000 persona.
For di òktober i despues di komienso dje di dos mandato di Abinader, e gobièrnu dominikano a ehekutá un plan di deportashon na gran eskala ku a kondusí na oumento di deportashonnan. Den apénas kuater luna 142.378 haitiano a keda ekspulsá.
Den un komunikado, e direktor di migrashon, Luis Lee Ballester, a bisa ku “lo oumentá e operashon di migrashon, ku inkorporashon di mas vehíkulo i rekursonan teknológiko pa repatriashon di esnan sin dokumento”.
Den kareda di 500.000 inmigrante haitiano ta biba na Rep. Dominicana, un pais di 10.5 mion habitante, aunke gruponan nashonalista ta bisa ku e kantidat ta mas tantu i ta reklamá pa medidanan migratorio mas severo.
Rep. Dominicana, ku ta kompartí 340 km dje isla di Española ku Haiti, den 2021 a kuminsá konstruí e muraya i e siman akí a anunsiá su ampliashon ku 12 km mas, yegando na algu mas ku 170 km.
Segun datonan divulgá den novèmber, e konstrukshon a avansá den un promé fase te na 80%, pero no ta bon kla pa ki tempu e obra lo ta kla.
