WASHINGTON, MERKA, AFP.- Republikanonan merikano a kritiká presidente Joe Biden djadumingu pa su maneho di e insidente di e globo chines, kual a keda bentá abou despues ku esaki a keda den e espasio aéreo di Merka durante vários dia. E insidente aki a hasi e relashon entre Washington i Beijing mas tenso.
Marco Rubio, e visepresidente di e komité di inteligensia di Senado, a kritiká e mandatario demókrata pa warda hopi pa alertá públiko miéntras e globo tabata realisando un buelo “sin presedente” riba Merka.
E gobièrnu a aktua “negligente”, segun indikashon di e legislador republikano.
Rubio a deskribí e buelo aki komo un intento di Beijingpa ridikulisá Biden nèt promé ku su mensahe di Estado di Union djamars, i pa laga un programa di bishita di e sekretario di Estado, Antony Blinken sin efekto.
Den deklarashonnan na CNN, Rubio a bisa ku e mensahe di Beijing tabata “nos tin kapasidat pa hasi esaki i Merka no por hasi nada al respekto”.
Mike Turner, presidente di e komité di inteligensia di Kámara di Representante a kritiká Biden pa motibu ku el a warda muchu hopi pa basha e globo abou.
