El a bisa ku e bia aki si e no tabata na altura di e droga
WILLEMSTAD.- Durante tratamentu di kasonan di droga, korte di promé instansia a trata kaso di un akusado residivista bibá na Hulanda, sin ku esaki tabata presente.
E tabata na Kòrsou i a trata na eksportá un kantidat di droga pa tera friu. Ta trata di un residivista ku den pasado a kai vários bia pa droga.
E akusado no a presentá, ni tampoko tabatin un abogado pa represent’é. Apesar di esaki, korte a trata su kaso tòg, mirando ku e tabata na altura di e fecha di e tratamentu.
Segun Ministerio Públiko, e akusado a deklará na polis, ku e bia aki, e no tabata na altura di e droga ku a hañ’e kuné. Despues di algun pregunta ku polis a hasi na e akusado, el a disidí di no kontestá nada mas i hasi uso di su derechi di keda ketu.
Segun fiskal, esaki ta di 4 bia ku e ta kai den man di hustisia pa mesun trafikashon di droga.
Fiskal ta di opinion ku mester atendé fuerte ku e residivistanan ku kada bes di nobo ta keda kai pa droga, mirando ku esaki ta e problema prinsipal ku ta keda kompañá ku violensia, arma i likidashonnan.
Mirando esaki fiskal ta yega na un demanda di 18 luna inkondishonal kitando aresto preventivo. Hues ku mester a tuma un desishon, a bisa ku lamentablemente e akusado no a presentá den sala, pa respondé algun pregunta ku korte tabatin pe, mirando ku na polis tampoko e no a papia nada.
Esaki tin komo konsekuensia, ku hues no sa nada di e akusado i no tin nada pa tene kuenta kuné. Mirando tur esaki nan hues a bisa di ta bai kompletamente di akuerdo ku e demanda di fiskal.
