Hendenan den protesta na Roxbury, New Jersey, kontra plannan di Trump pa konbertí un depósito den un sentro di detenshon di ICE.
ROXBURY, Merka.- Residentenan di un suburbio konservador den New York a protestá formalmente kontra di plannan pa konbertí un depósito den un sentro di detenshon di inmigrantenan, un medida ku ta parti dje kampaña di deportashon masivo dje gobièrnu di Donald Trump. E oumento den kantidat di aresto di inmigrantenan ta alimentá e demanda pa mas sentro pa sera esnan ku keda detené, i outoridatnan a kuminsá konsiderá sentronan logístiko pa esei.
“Esaki ta un depósito. E ta diseñá pa warda paketenan i merkansia, no sernan humano”, segun un dje manifestantenan kende a liderá e protestanan kontra dje plannan pa e lokalidat di Roxburgy. Ku kasi 46.500 m2 di superfisie, e struktura tin vários porta pa karga di trùknan i ta pegá ku un otro depósito ku si ta den uso.
For di Texas te ku Pennsylvania, Servisio di Inmigrashon i Kontròl di Duana (ICE) ya a kumpra òf hür por lo ménos ocho instalashon di e tipo ei pa hasi di nan un sentro di detenshon. Sinembargo, e agensia federal enkargá ku e ofensiva imigratorio a retirá for di algun dje lugánan pa motibu dje rechaso di e poblashon.
Enkuestanan a sugerí ku ICE a pèrdè e apoyo entre merikanonan debí na su táktikanan agresivo. “Mi no ke kamponan di konsentrashon inhumano den mi pais, i muchu ménos aki den New Jersey”, segun Heidi, un enfermera di 50 aña di edat.
