Pablo Walter a traha 59 aña den enseñansa, pasa su edat di penshun sigui traha den loke e tabata gusta esta guia nos hóbennan. Ku entusiasmo el a konta Djasabra su eksperensia i kon e ta mira enseñansa awe, kiko e ta kere por kambia i en partikular nos hóbennan. El a duna lès for di e muchanan di mas chikí na enseñansa di fundeshi, e tempu ei skol básiko i a yega te na duna guia na esnan ku tin di bai para dilanti di klas.

 

Di promé klas te rèktòr di Radulphus

Walter Pablo a kaba 12 di yüni 1959 komo maestro i a kuminsá traha 15 di yüni na aña ‘59 i a traha te 2018. El a kuminsá na St. Joris College na Sta. Maria; e tempu ei Mulo. E tempu ei tabatin e  diferensia entre skol pòrnada i Mulo. Skol pòrnada tabata 7 aña skol básiko i Mulo (onderbouw) 6 aña. E mes ta desendiente di un skol pòrnada, Bonifacia skol pa 7 aña largu i despues a sigui subi. El a kuminsá a traha 7 aña na St. Joris College den e promé klas. Di einan di klas 1 el a bula pa klas haltu pasobra el a bira kabes di skol na Sta. Claraschool na Jandoret. Di einan el a sigui studia ulandes i a bai Ulanda. Einan el a studia 6 aña i 3 luna na Tilburg i a bin Kòrsou
bèk na 1979 na luna di desèmber. El a yega bispu di Pasku anochi i a kuminsá traha e promé siman di 1980 na Radulphus College.

I einan el a keda te 1997 ora el a baha ku penshun. Banda di esei el a duna lès  un periodo kòrtiku den hospital na enfermeronan, el a duna lès na MTS di anochi, el a traha ora el a bin bèk na Radulphus e tabata traha tambe na Avond Lyceum PSC i a traha promé un periodo largu na Fakultat di Bouwkunde na Universidat di Kòrsou, el a traha, mitar aña na Boneiru den klase di eksámen pasobra e dosente a bira malu, el a traha na Akademia Pedagógiko i despues na Universidat kier a kuminsá ku un estudio di anochi pa maestronan i el a yuda traha e kuríkulo na ulandes i duna lès einan. Ora Akademia Pedagógiko a bai over pa Universidat el a bai ku nan, i einan el a keda te na òktober 2018. Tambe el a traha den departamento di onderwijs pa 2 aña den un temporada pa krea material pa skolnan avansá; esei si no a kana dje bon ei i despues di 2 aña el a haña ku tabata basta pe. E tabata algun aña den e komishon ku ta traha eksámen Mavo 3 i 4 ulandes i ku huntu ku koleganan nan tabata biaha pa Aruba i Boneiru i tene enkuentronan di trabou aki na Kòrsou. “Mi a move hopi den enseñansa”, asina Walter Pablo a konta nos ku hopi orguyo di su trayektoria  den enseñansa.

 

Dushi rekuerdo

Na tur tres skol ku el a traha e tin dushi rekuerdo. Na St. Joris el a traha di 59 pa 66 i a traha masha dushi i tabatin bon kontakto ku mayornan i alumnonan. Den nan tin eks alumnonan ku e tabatin den klas 1 i a logra puestonan masha haltu na Kòrsou. I te ainda ora e topa nan, ounke e no ta kòrda nan, nan si ta kòrd’e. Na Jandoret na Sta. Claraschool ta dushi hendenan di e bario di Jandoret i San Michiel Liber, muchanan di seru Grandi, masha dushi mes. Na Radulphus College tampoko e tin nada di papia ku a bai robes. “I mi no por gaña ku e 6 aña ku 3 luna ku mi a studia na Ulanda mi a traha na un skol einan.  Mi a bai studia Ulanda ku un ‘studie opdracht’ di gobièrnu di Kòrsou. Ora mi a yega Ulanda na ougùstùs 1973 a drenta e problema di ‘golf oorlog’. Esei a nifiká ku gobièrnu tabata manda sèn pa mi via di un ‘koers’ di dòler i mi ta den servisio di gobièrnu i mi mester a studia pero ta kobra den dòler. E diferensia pa luna tabata nifiká ku tin luna e tabata mas di 400 florin ulandes ménos i na kas so e tabata traha 400 florin. P’esei mi mester a bai traha”. El a konta di un sorto di rivalidat ku tabatin di esun ku ta kompleto “bevoegd” i e otro no. Pero Walter tabatin su Hoofdakte. I ora el a yega Ulanda i nan a haña sa ku e tin e hoofdakte ei, nan a bira loko. “Si tabatin teblachi di oro pa karga mi aden, wèl….”, el a bisa masha orguyoso den e entrevista ku Djasabra. E por a skohe unda e kier a bai traha pasobra e hoofdakte tabata di gran balor, ku e hoofdakte e por a duna tur vak ku eksepshon di idiomanan estranhero. El a bisa si ku e no ta duna biologia pasobra e no konosé e matanan na Ulanda. E tabata duna tur vak durante di 6 aña. I aserka e tabata duna muzik. I muzik Walter a duna pasobra na Kòrsou e tabata dirigente di koro na Suffisant. Ora el a yega Ulanda e notisia a kana promé kuné mes ku e ta dirigente di koro. Na Tilburg tabatin kor di studiantenan di Antia “Koro kanta Antias”. Promé ku el a yega Ulanda ya a pidié pa tuma e kor over, esaki el a hasi tambe. Pero e mester a duna muzik na skol tambe pasobra nan a haña sa ku e ta dirigente di koro. Na final di su karera na Ulanda, e direktor di e skol tabata un frater, el a bira malu i tabatin un tempu di bida. Den e tempu ei Walter a kaba un parti di su estudio i ku su famia a bin Kòrsou bin keiru un ratu. E frater a bisé ku e tin di kanta misa di su entiero. Ora Walter a bai Ulanda bèk, un siman despues e frater a fayesé i Walter a kanta su entiero.

 

Kasita di kontròl na porta di skol

Pablo Walter tin rekuerdonan masha grato di su temporada den enseñansa. El a bisa Djasabra ku ta un kos so e ta kòrda un poko fèrfelu tempu e tabata rèktòr na Radulphus College, ku pe no tabata agradabel ta ku dado momentu el a disidí di sera porta di skol pasobra e muchanan ta sali krusa kaya bai e tienda dilanti di skol i esei ta masha peligroso. Un bia outo asta a dal un mucha. Un mucha ku a bin for di Mavo i ku tabata den Havo 4 a organisá un Walk out pisá ku a sòru asta pa presensia di polis. Asta nan a kibra porta di kurá di skol. “Mi a tuma paso drástiko kontra di dje tambe pasobra den e parti ei mi no ta mòrs”, asina Pablo a konta. Otro kos laf tabata ku den kombersashon ku komishon di mayornan i esun enkargá ku e skolnan a disidí di traha un kasita na entrada di e skol pa tene esnan ku bo no ke na skol pa tene nan pafó. Tabata haña ku ta bin muchanan di otro skolnan ta drenta paden i hasi fèrfelu ku e mucha muhénan. “Un bia ma mira asina bidèm ku un ku a  bin ‘racehel” ku mi, ku mi a lanta i mi mes no tabata sa ku mi a dal e un kònòpi benta abou. El a dal abou i lanta sali na kareda kore limpi. Awor Pablo Walter su nòmber ta kore rònt ku e ta bòksdó tambe”. E edifisio ei a keda trahá sin ku e skol mester a hinka niun sèn den dje. Direktiva di skol a duna lus bèrdè pa trah’é. Pero ora a traha e kasita ta bin otro funshonario di direktiva di skol ku tin di basha e edifisio abou. Pero Pablo a nenga i a yama e presidente di komishon di mayor. E komishon di mayor a pone nan na òrdu i e edifisio tei te awe. “Ainda mi tin kontakto ku e skol i si mi tin di bai einan mi ta pasa via di e kasita ei i duna nan mi reibeweis pa puntra si mi tin mag di bai paden. Mi a mantené mi mes na e regla ei”. Pero por lo demas el a traha masha dushi na e skol ei, te ora el  a baha ku penshun i a bai traha na tur e otro áreanan di enseñansa manera duna direkshon na futuro maestronan.

 

Diferente kambio den enseñansa

Durante di su 59 aña den enseñansa tabatin diferente kambio ku a tuma lugá. E promé ku el a eksperensia ta ku ora e tabata na skol básiko ku skol di pòrnada i Mulo a bira un skol esta 6 aña di skol básiko. E tabatin diferensia grandi pasobra e skol di pòrnada ku tabata yama den terminologia di lei GLO B School tabata un skol diskriminatorio. Maske e mes a bai e skol ei te a kab’é, pero e tabata diskriminatorio. Na e skol ei e papelnan ku un maestro tabatin mester pa duna lès no tabata igual na esnan ku na un Mulo Onderbouw. Tabata yama nan  e tempu ei Kweekelingen met akte, tabata hendenan ku no a kaba skol básiko i a bai 2 pa 3 aña Mulo bovenbouw i nan a yega te 8ste klas i sùrnan tabata pidi nan pa para dilanti di klas i nan ta haña un tiki pedagogia i un outorisashon pa por para dilanti di klas. Na Mulo school bo mester tin por lo ménos onderwijs 3de rang hoofdakte. Esei ta un kambio ku a bin ku a kue skolnan di pòrnada i hasi nan igual na Mulo onderbow. Na Mulo e muchanan tabata haña tambe den 6de klas ingles i spañó pero na e GLO B school esei no tabata tuma lugá. Despues a bin den enseñansa total na Kòrsou un kambio grandi. Skolnan tabata kore di sèptèmber te 31 ougùstùs di aña siguiente. Dado momentu na Kòrsou a kambi’é di 1e ougùstùs pa 31 yüli ku e ta te ainda asina. Esei pasobra e tempu aya tabatin hopi hende den enseñansa di Ulanda. Nan ta bai keiru den fakansi grandi Ulanda i ántes ora e fakansi tabata kai den ougùstùs tempu ta kuminsá daña na Ulanda i nan ta kere ku ta dushi wer i ta topa ku tempu ku áwaseru. I pa duna e hendenan ei e chèns di bai tòg i disfrutá di nan fakansi e BC di e tempu ei a hala e aña eskolar ku un luna atras. Tempu Pablo a kuminsá na St. Joris College, e huntu ku un mucha di Montaña tabata e úniko 2 yunan di Kòrsou i tur sobra ulandes. I e GLO B school ta haña mas yu di Kòrsou. Tempu el a traha na Paulus College e so tabata yu di Kòrsou i sobrá ulandes.

 

Atenshon di mayornan

Na Mulo onderbouw tabatin algu masha notabel; bo ta haña hopi atenshon di mayornan pa nan yunan. E no sa ku esei ta pasobra mester paga, pero e atenshon tabata hopi. E maestro no mester tabatin ni e mainta òf anochi di informashon pero mayornan ta bin konstante. I muchanan tabata siña hopi. E enseñansa tabata únikamente na ulandes, pero esei no ta nifiká ku e mucha no mag di papia papiamentu, pero enseñansa  tabata na ulandes. I di diferente su eks studiantenan for di klas 1, nan a yega leu.

Ku papiamentu so, e no ta mir’é

Pablo ta un fiel usadó di papiamentu, el a skibi diferente komedia na papiamentu, el a skibi poesia na papiamentu i e tin hopi kantika entre otro di kor, komponé na papiamentu. E lenga di papiamentu ta den dje pero e ta realista. “Nos komunidat ta masha chikitu, kiko lo por hasi si a base di e papiamentu ei so bo ke bai dilanti. Mi no ta mir’é. Na universidat mi a mira algun studiante ku a bin i bo ta mira nan hopi dediká di skol di papiamentu i dado momentu nan a kai atras i sali for di e estudio pasobra nan no por a sigui. Mi ta bisa shonnan laga nos ta realista, ku e papiamentu so nos no ta logra nada. Nos ta chikitu i si nos no ke mantené nos mes den reino i ke bula afó, si e pueblo ke, i ku nos ke un enseñansa ku tin balor pa nos komunidat ku ta bini, si nos no ke sigui ku e ulandes, kua otro idioma sea ingles òf spañó òf asta awendia mandarein pasobra tin yen chines akinan, pero si mi ta bisa ku mester hasié ku dedikashon i no mitar mitar”, Pablo a enfatisá.

 

Hùiswèrk mester keda trahá na skol

E loke Pablo ke mira kambiá den enseñansa ta; loke el a mira den akademia pedagógiko den último añanan i ta mir’é tambe serka su nietu den grupo 8 i e kos di mas grandi ku e ke mira ta kon por hasi ku skolnan ta respetá e muchanan su ora liber despues di skol. E kos aki ta un krímen. E nietu di dje ora e yega kas ku e tas ku e tin, un par di bia Pablo a hisa e tas i a ripará ku e tas ei tin mas di 10 kilo di buki den dje. I ora e muchanan sali skol mèrdia, skol no a kaba pa nan. Pasobra awor tin di bai ‘huiswerk begeleiding’ te atardi lat. Pa e mayornan ku ta traha ta masha ‘leuk’ pasobra e mucha ta bon kuidá pasobra skol ta mitar dia, pero ta lubidá ku un mucha ta un bia den su bida e ta mucha. I e mucha ei mester haña chèns di desaroyá no solamente su mente i kabes pero su kurpa tambe. Un di e manera nan pa e desaroyá ta por ehèmpel deporte. Moveshon; pero e mucha no tin e posibilidat ei i e tin e impreshon ku tin sierto rivalidat entre sierto skolnan di kua ta skor na e EFO toets mas haltu i kua tin mas mucha ku ta bai Havo/VWO i ta pusha e muchanan ku hùiswèrk. Pablo a bisa ku den su tempu di skol básiko, tempu e tabata mucha ta un kos nan tabata haña hùiswèrk i ta katisashi. I ta haña ratu pa sinta den lès mes pa siñ’é. Tur otro lès ta den klas a siña nan. I ora  e tabata traha na skol básiko no tabatin kuenta di bai kas ku hùiswèrk. Muchanan ta siña na skol pasobra despues di skol e mester tin chèns di dibertí, hunga, drenta organisashonnan. I esei ta su doló di mas grandi aktualmente i no tin niun hende ainda ku por konvensé Pablo ku ta asina mester ta. Esei ta su deseo pa tur mucha pasobra e kos aki no por. Ta un krímen. Muchanan mester haña chèns di hunga i desaroyá nan mes.

 

Hopi preshon riba e mucha

Pa loke ta su eksperensia ménos agradabel Pablo Walter ta kòrda na Radulphus ora e mucha tabata den brùg klas i mester a bai klas 2 i despues splet pa Havo òf VWO. “Un dia un mayor a bin skol pa papia ku e kònrèktòr di brùg klas, kende a bis’é ku tin sierto problema ku su yu i nan ta kere ku ta mihó e mucha bai Mavo. E mama na ulandes ta bisa e kònrèktòr  ‘en nu wat moet ik tegen de buren zeggen. Ik heb altijd gezegd dat mijn zoon op VWO zit”. Esei ta nifiká ku ta hinka e mucha den un kaminda ku no ta nesesario. Otro ehèmpel ku Pablo a menshoná ta di un mucha na ETAO pasobra el a sali di skol básiko. Su mayornan tabata den enseñansa tambe. Nan a bisa pa laga e mucha kana trankil pasobra e mucha tin di dibertí i bai manera e por. E mucha a kaba ETAO i bai Mavo 3, despues Mavo 4 i a kaba einan i a bai Radulphus. Tabata un mucha ku trayektoria largu i regla ta pone ku ta pone den Havo 4. E mucha a bai Havo 4 i tabata bai masha bon i kònrèktòr a pensa pa mand’é VWO 4. E mayor a nenga i pa laga e mucha kana ‘rustig’ trankil. E mucha a kaba su Havo i bai su VWO 5 i 6 i a slag e mihó. El a bai Ulanda i despues di algun aña na universidat el a bira asistente di profesor. “Laga e mucha kana su tempu”, asina Pablo a enfatisá den e entrevista ku Djasabra.

 

LTS i Feffik lo hasi falta

Pablo ta sinti masha falta di un LTS. El a bisa ku su deseo tabata pa bai LTS pa e bira karpinté meskos ku su tata. Pa e tempu kòrtiku ku e ta kòrda su tata e ta kòrda ku e tabata laga Walter hunga ku tur hèrmènt di dje. I kada bes e tabata bis’é ki dia e ta bira manera tata. E tabatin deseo di bira karpinté. Pero su dos mannan den kas awe òf pa hende ta move manera mester ta. E ta gusta karpinteria. “Nos ta den reino i mester por konektá ku otro pero na Ulanda a bèk e asuntu di inkorporá e ‘vakmanschap’ den sierto tipo di enseñansa  ku e no ta pas. E kos di mas fout ku nos a hasi ta kue e skolnan tékniko i hasi nan otro kos. I e kos ku ta duel mi mas awor ta ku nan a sera Feffik”, Pablo a enfatisá. Un fishi ta un trabou di honor. Trabou ta trabou i no ta bèrgwensa.

 

Mensahe pa mayornan

Pa mayornan e tin vários mensahe;

Mayornan nos mester tene kuenta ku bo yu ta un bia nan ta mucha. I un mucha no kere ku ta e bukinan so ta desaroy’é. Un mucha mester por desaroyá su mes tambe dor di ta praktiká den su oranan liber diferente tipo di deporte, diferente tipo di organisashonnan ku e por hasi hopi kontakto ku otro pa desaroyá e komo un miembro di un komunidat pasobra hopi bia ora tende kosnan ku ta sosodé di mucha hóben ku ta kometé sierto kosnan manera krímen, e muchanan aki no a haña e formashon di respetá otro den komunidat manera mester ta. Nos mayornan nos mester wak pa no laga enseñansa i buki so ta importante. Skol mainta, opvang atardi pa e traha riba trabounan ku e mester a hasi na skol kaba. Duna e mucha chèns pa e forma su mes sosial. Si mucha ke drenta organisashon manera skouting i diferente otro organisashon, lag’é hasié. E mucha ta siña desaroyá su mes den un komunidat sosial. “Nos tur ta miembro di un komunidat i nos tin di komportá komo miembro di e komunidat i respetá otro. E mucha mester lanta ku e  formashon ei, i mayornan no ta skol so i no ta buki so ta forma un mucha. Un hende ta wòrdu formá dor di e komunidat ku e ta aden i dun’é chèns pa e forma su mes den e komunidat”, Pablo Walter a pone énfasis ariba.

 

 

LAGA UN KOMENTARIO

Please enter your comment!
Please enter your name here