Di akuerdo ku un desishon nobo tumá pa gobièrnu kubano, entrante ayera e transpòrt di trein entre provinsianan por tuma lugá kada 16 dia.
LA HABANA, Cuba (AFP).- Restrikshonnan drástiko a drenta na vigor ayera pa transporte públiko na Cuba, pais gòlpiá pa falta di kombùstibel i kaminda asiento den treinnan i bùs awor ta keda reservá pa hende malu, pa entiero i otro emergensia. E isla di 9.6 mion habitante praktikamente for di yanüari tin skarsedat enorme di gasolin, despues ku Merka a kòrta su importashon di petrolio komo parti di un kampaña di preshon pa forsa un kambio di régimen.
Transporte, ku ya tabata enfrentá e krísis ekonómiko di mas pió den historia resien, a keda redusí kasi kompleto miéntras ku pòmpnan di gasolin ta keda seku.
Kuminsando ayera, treinnan ku sali for di La Habana ta sirkulá solamente kada 16 dia, loke te ku djárason tabata tuma lugá tres biaha pa siman. Bùsnan di estado, ku ántes tabata kore por lo ménos un biaha pa dia pa e kapitalnan di provinsia, awor lo hasi esei entre un pa tres biaha pa siman.
E vise minister i transporte, Luis Ladrón de Guevara, a asentuá ku no tin mester di pèrmit pa biaha, pero ku tòg esaki lo funshoná ”ku un sistema di prioridat”. Pasaheronan mester entregá nan petishon di biahe ku shete dia di antisipashon.
Ounke algun taksi i trùknan privá ta sigui kore pa otro siudat, nan tarifanan ta kasi 200 biaha mas haltu na esun di transpòrt estatal.
Den La Habana, bùsnan urbano práktikamente a disparsé, lagando hopi hende sin otro opshon sino di kana bai trabou òf skol na momento ku e pais ta konta ku temperaturanan serka di 40 ºC.
Ku preis di kombùstibel riba merkado informal te ku 8 dòler pa liter, un trayekto kòrtiku den taksi por guli gran parti di salario di un trahadó di gobièrnu.
