Restunan di Mladic risibí ku honornan militar

SERBIA (AFP).- E restu mortal dje eks-hefe militar serbobosnia Ratko Mladic, konosí pa e apodo “E karnisero di Bosnia”, a keda risibí na Belgrado ku honornan militar. Mladic a muri siman pasá na Den Haag, kaminda e tabata kumpli ku kastigu di bida largu pa krímennan di guera.
E eks-general a dirigí e forsanan serbio di Bosnia durante dje guera di 1992-1995. Nan tabata mir’é komo un héroe, pa despues deskribí su persona komo “figura di maldat apsoluto” pa e krímennan ku el a kometé relashoná ku Sarajevo i e masakre di Srebrenica.
E kaha ku e restu mortal di Mladic, kubrí ku e bandera serbio, a keda bahá for di avion pa seis militar despues di su yegada for di Den Haag, den presensia di su yu, Dark, i e minister di hustisia di Serbia, Nenad Vujic. Despues el a keda trasladá den un karavana eskoltá pa polis i a hib’e un hospital militar di Belgrado. Riba e ruta pa bai e hospital, desena di hóbennan a reuní riba e outopista ku pankartanan na homenahe di Mladic.
Tribunal di Den Haag a ordená un investigashon kompleto riba e sirkunstansianan ku a rondoná e morto di Mladic. E presidente serbio, Aleksander Vucic, a deklará di ta spera ku “desena di míles di hende” lo asistí na e entiero di Mladic. El a keda detené den 2011 na Lazarevo, Serbia, despues di 16 aña di huida, i a keda ekstraditá pa Den Haag.
Den 2017 el a keda kondená na bida largu di prizòn pa genosidio, krímennan di guera i krímennan kontra di humanidat durante dje guera ku a laga den kareda di 100.000 morto.