WILLEMSTAD.- Awe djaweps 5 ougùstùs den oranan di atardi e tim di krísis di gobièrnu huntu ku demas entidatnan di kontròl i mantenshon di órden lo reuní ku organisadónan di evento i doñonan di klup, spesialmente klupnan kantu di laman (“beachclubs”). Por spera ku pa otro siman gobièrnu lo bai anunsiá medidanan adishonal pa atendé ku situashonnan di aglomerashon di hende.
Apesar ku durante di e kontròlnan ta konstatá den mayoria kaso kosnan ta òrdu ku kontròl na porta tòg tin un preokupashon grandi ta biba relashoná ku e aglomerashon di hende ku tin den e establesimentunan aki i na eventonan. Ta teme despues di a studia potrèt di eventonan ku a tuma lugá den simannan tras di lomba ku den dianan benidero e kantidat di kasonan positivo ku Covid-19 lo bolbe mustra un oumento . Tabata hala atenshon di gobièrnu riba e problemátika di aglomerashon di hende durante eventonan i den klupnan, pero tòg gobièrnu no a tuma medida adishonal i mantené un maneho di hasi kontròl na porta riba bakunashon òf tèst negativo.
Sinembargo por tuma nota ku sifranan di atmishon di hende ku e malesa di Covid-19 ta subiendo miéntras ku e ayudo ku ta risibí for di Hulanda pa atendé ku e pandemia aki lo keda bai bira ménos den futuro. Te ku djarason 4 ougùstùs tabatin 21 persona hospitalisá ku Covid-19 di kua 5 ta den kuido intensivo. Tambe t’asina ku tin morto a kuminsá kai atrobe debí na hendenan ku a haña Covid-19. Ta bin aserka ku bou di e personal di hospital tin hende ku tin trouma i síntomanan di kansansio debí na e preshon enorme ku tabatin riba kuido ku e oumento di kasonan di infekshon na mart i aprel último.
Tur esakinan ta pone ku gobièrnu tin intenshon pa despues di deliberashon awe ku promotornan i doñonan di klup pa wak ki medida adishonal por tuma pa tene e situashon di Covid-19 bou di kontròl.
